ޕެނަޑޯލް 500ގ ގުޅަ ބޭސް ވިއްކުން ވަގުތީ ގޮތުން ހުއްޓާލުމަށް އެންގި އެންގުން ނިމުމަކަށް ގެނެސް އެ ބޭސް ބޭނުންކުރުމުގެ ހުއްދަ މޯލްޑިވްސް ފުޑް އެންޑް ޑްރަގް އޮތޯރިޓީ(އެމްއެފްޑީއޭ) އިން އަލުން ދީފިއެވެ.
އެ އޮތޯރިޓީއިން މިއަދު ނެރުނު ބަޔާނެއްގައި ބުނީ، ބޭހަށް ދިމާވި މައްސަލަ އާއި ގުޅޭގޮތުން ބަލަންޖެހޭ ކަންކަން ބެލުމުން، ބޭހުގައި ހުންނަން ޖެހޭ ވަރަށް (ކޮންޓިޓޭވިޓް ޓެސްޓުން) ބޭހުގެ ބާރުހުރިކަން ދެނެގަނެވިފައިވާ ކަމަށެވެ.
އަދި މި ކުރިން މައްސަލަ ދިމާވި މި ބޭހުގެ ބެޗު މިހާރު ރާއްޖޭގައި ނެތްކަން ވެސް އެ އޮތޯރިޓީން ވަނީ ފާހަގަކޮށްފައެވެ.
ޕެނަޑޯލް ވިއްކުން މަނާކޮށް މީގެ ކުރިން އެ އޮތޯރިޓީން ނެރުނު ބަޔާނެއްގައި ބުނީ، ރާއްޖެ އެތެރެކޮށް ވިއްކާ ޑޮކްޓަރީ ބޭހުގެ ރައްކާތެރިކަމާއި ފެންވަރު ކަށަވަރު ކުރުމަށްޓަކައި، "ޕޯސްޓް މާކެޓް ސާވައިލަންސް ޕްލޭން" އެއް ހަދައި، އެ ޕްލޭނާއި އެއްގޮތަށް ރެންޑަމް ސާމްޕަލް ނަގައި، ބޭހުގެ ކޮލިޓޭޓިވް އަދި ކުއަންޓިޓޭޓިވް ޓެސްޓުތައް ކުރަމުން އަންނަ ކަމަށެވެ.
އެގޮތުން މާކެޓުން ނަގާފައިވާ ސާމްޕަލްއެއްގެ ތެރެއިން، ސްރީލަންކާގައި އުފައްދާ ޕެނަޑޯލް (500 މިލިގްރާމް ޓެބްލެޓް) ޓެސްޓުކުރިއިރު ބޭހުގެ ބައެއް ގުޅަތައް ފުނޑުވެ، ބޭސްގުޅައިގެ ވަށައިގެން ތަންތަންކޮޅުން ނެއްޓިފައިވާ ކަން ފާހަގަކުރެވިފައިވާ ކަމަށް އެމްއެފްޑީއޭއިން ބުންޏެވެ.
އާންމުގޮތެއްގައި ބޭސް ގުޅައެއް އެގޮތަށް ދިމާވަނީ ބޭސް އުފެއްދުމުގައި ނުވަތަ ބޭސް ރައްކާ ކުރުމުގައި ފުރިހަމަ ކުރަންޖެހޭ މިންގަނޑުތައް ފުރިހަމަ ނުކުރުމުން ކަމަށާ އަދި އެފަދަ މައްސަލައެއް ދިމާވެފައިވާ ބޭސް ބޭނުންކުރުމުން ބޭހުގެ ލިބެންޖެހޭ ފައިދާ ނުވަތަ ބޭހުގެ "އިފެކްޓް" ނުކުރުމުގެ ފުރުސަތު ބޮޑު ކަން އެމްއެފްޑީއޭ އިން ފާހަގަކޮށްފައި ވެއެވެ.
އެހެންކަމުން އެ ބޭހުން ފާހަގަވި މައްސަލަ ދިމާވާން މެދުވެރިވި ސަބަބު އެ އޮތޯރިޓީން އިތުރަށް ބަލައި ދިރާސާކުރަމުން އަންނަ ކަމަށް ވެސް އެމްއެފްޑީން ބުންޏެވެ.
Advertisement
This content is created and paid for by advertisers and does not involve Voice Journalists
