ކުރީގެ ރައީސް އަބްދުالله ޔާމީން އަބްދުލް ޤައްޔޫމަށް  މިއަދުގެ ގާނޫނުގެ ރައްކާތެރިކަމާއި، ހަމަހަމަކަށް ޖުޑީޝަރީން ކަށަވަރުކޮށްދޭ ކަމަށް ގަބޫލުފުޅު ނުކުރައްވާ ކަމަށް ރައީސް ޔާމީންގެ އިސް ގާނޫނީ ވަކީލު އަދި ކުރީގެ ނައިބު ރައީސް ޑރ.މުހައްމަދު ޖަމީލު އަހުމަދު ވިދާޅުވެއްޖެއެވެ.

ރައީސް ޔާމީންގެ އިސްތިއުނާފް މައްސަލަ ލަސްވާތީ ކަންބޮޑުވުން ފާޅު ކުރައްވަމުން ޖަމީލު ވިދާޅުވީ ފަނޑިޔާރުންނަކީ ދުސްތޫރުގެ ސުޕްރިމަސީ ނަގަހައްޓަން ހުވާ ކޮށްގެން ތިބި، ޒިންމާދާރު އަދި ސިޔާސީ ނުވެ، ވަކި ފަރާތަކަށް ނުޖެހި ގާނޫނޫގެ ވެރިކަން ދަމަހައްޓަން ތިބި ބައެއްކަމަށެވެ. އަދި މިނިވަން ޖުޑިޝަރީއެއްގެ އެންމެ އަސާސީ އެއް ސިފަ އަކީ އެއްވެސް ބިރެއް، ޖެހިލުމެއް ނެތި، ވަކި ފަރާތަކަށް ޖެހުމެއް ނެތި، ވަކި މީހަކަށް ވީތީ، އަދި އެއްވެސް ދިމާލަކުން އަންނަ ނުފޫޒަކަށް ނުލެނބި މައްސަލަތައް ހަމަހަމަކަމާއި އަދުލުވެރިކަމާއި އެކު ނިންމުންކަން ވެސް ޖަމީލު ފާހަގަ ކުރެއްވިއެވެ.

ޖަމީލު ވިދާޅުވީ އިންތިހާބު ތަކާއި ދިމާކޮށް ރައީސް ޔާމީންގެ މައްސަލައިގެ އިސްތިއުނާފު ކޯޓުތަކުން ލަސްވާ މަންޒަރު ފެންނަ ކަމަށެވެ. އަދި ރައީސް ޔާމީންގެ މައްޗަށް ކުށެއް ސާބިތު ކުރަންވީމާ، އަވަސް އަވަހަށް ޝަރީއަތްތައް ހިންގައި ހުކުމް ޖަހާތަން ވެސް ފެނިގެން ގޮސްފައިވާ ކަމަށެވެ.

އެހެންކަމުން، މިކަންކަމުގެ މައްޗަށް ބަލާއިރު، ރައީސް ޔާމީނަށް މިއަދުގެ ގާނޫނުގެ ރައްކާތެރިކަމާއި، ހަމަހަމަކަށް ޖުޑީޝަރީން ކަށަވަރުކޮށްދޭ ކަމަކަށް ގަބޫލުފުޅު ނުކުރައްވާ ކަމަށް ޖަމީލު ވަނީ ވިދާޅުވެފައެވެ.

މީގެ ކުރިން ޖަމީލު ވަނީ ރައީސް ޔާމީން އަށް ލިބިލެއްވި ހުރިހާ ލުޔެއް ލިބުނީ ކުރީ ސަރުކާރުން ކަމަށްވެސް ވިދާޅުވެފައެވެ.

ވ. އާރަށް ކުއްޔަށް ދިނުމުގައި ރިޝްވަތު ނެންގެވުމާއި މަނީލޯންޑަރިިން ކުށް ސާބިތުވެ 11 އަހަރަށް ޖަލަށް ލުމާއި 5 މިލިއަން ޑޮލަރުން ޖޫރިމަނާކުރުމަށް ރައީސް ޔާމީންގެ މައްޗަށް ކްރިމިނަލް ކޯޓުން ހުކުމް ކުރީ 2022 ވަނަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ. 

އެ މައްސަލަ ހައިކޯޓުގައި އިސްތިއުނާފުކޮށް އިސްތިއުނާފުގެ އަޑުއެހުންތައް ނިމިފައިވާއިރު ހުކުމް ކުރުމުގެ އަޑުއެހުން ލަސްވާތީ އެކަމުގެ ކަންބޮޑުވުން ޔާމީންގެ ވަކީލުން އަންނަނީ ފާޅުކުރަމުންނެވެ. އަދި ރައީސް ޔާމީން އަދިވެސް މިނިވަންވެވަޑައި ނުގަންނަވާތީ، ރައީސް ޔާމީނަށް ތާއީދު ކުރާ ފަރާތްތަކާއި އިދިކޮޅުގެ ފާޑުކިޔުންތައް ވަނީ ސަރުކާރަށް އަމާޒުކޮށްފައެވެ. 

ރައީސް ޑރ. މުޢިއްޒުގެ ވަޢުދުފުޅާއި އެއްގޮތަށް އެމަނިކުފާނު އިންތިޚާބުވެވަޑައިގެންނެވި ރޭގައި، އޭރު ވެރިކަމުގައި ހުންނެވި ރައީސް އަށް ދަންނަވައި، އޭގެ އަނެއް ދުވަހު އެމަނިކުފާނު ގެއަށް ބަދަލުކުރައްވާފައިވާއިރު، ރައީސް އޮފީހުގެ އިސް ތަރުޖަމާނުގެ މަގާމުގައި ކުރިން ހުންނެވި މުހައްމަދު ޝަހީބު ވަނީ ރައީސް ޑރ.މުޢިއްޒު ކުރެއްވި ދުވަހު ވިދާޅުވިފަދައިން ޝަރުޢީ ދާއިރާއަށް ސަރުކާރުން އަތްބޭނުން އެދުވަހުން އެދުވަހަށް ނިމިގެން ގޮސްފައިވާ ކަމަށް ވިދާޅުވެފައެވެ. އަދި ރައީސް ޔާމީން މިނިވަންވެވަޑައިގަންނަވާނެ ދުވަހެއް އެނގިލައްވާނީ ޖުޑިޝަރީއަށް އަށް ކަމަށާއި, ސަރުކާރުން އެއަށް އަތް ނުބާނުއްވާނެ ކަމަށް ވެސް ވިދާޅުވިއެވެ.