އެމަނަވަރެއް ރާއްޖެއާއި ކައިރިކުރާތީ އަވަށްޓެރި އިންޑިއާއިން ނުތަނަވަސްވެގެން އުޅުނު ޗައިނާގެ ރިސާޗް މަނަވަރު ރާއްޖޭގެ ކަނޑުގެ ސަރަހައްދަށް މިއަދު ވަދެއްޖެކަމަށް އިންޑިއާގެ ނޫސްތަކުން ބުނެފިއެވެ. 4300 ޓަނުގެ ޝިއާންގ ޔަންގ ހޮންގ ކުޑައިރުކޮޅެއްގެތެރޭގައި ރާއްޖޭގައި ބަނދަރުކުރާނެ ކަމަށްވެސް ބުނެއެވެ.

ޗައިނާގެ ރިސާޗް މަނަވަރު ބައިނަލް އަގުވާމީ ކަނޑުގެ ސަރަހައްދަށް ނުކުތިއްސުރެ އިންޑިއާއިން ފާރަލަމުން އެގައުމުގެ މީޑިއާއިން އޭގެ ދަތުރުގެ އަޕްޑޭޓްތައްދަނީ ގެނެސްދެމުންނެވެ.

އިންޑިއާގެ ނޭވީ ޗީފް އެޑްމިރަލް އާރް ކުމާރު މިދިޔަ ހަފްތާގައި އެންޑީ ޓީވީގައި ބުނެފައިވަނީ މި މަނަވަރު ރާއްޖޭގެ ސަރަހައްދަށްވަދެ ރާއްޖޭގެ ކަނޑުއަޑީގެ ފޮޓޯނަގައި ހަދައިފިނަމަ އަސްކަރީ ސަބްމެރީން ބޭނުންކުރާނެ ގޮތް ނުވަތަ އިންޑިއާ ކަނޑުގައި ސަބްމެރީން އޮޕަރޭޓް ކުރުމުގެ ކުޅަދާނަކަން ލިބިގެންދާނެތީ އިންޑިއާގެ ކަންބޮޑުވުން އޮތްކަމަށެވެ. 
އިންޑިއާގެ މީޑިއާތައް އެގައުމުގެ އަސްކަރީ އޮފިޝަލުންނާއި ހަވާލާދީ ބުނަނީ ރާއްޖެއަށް މި ބަނދަރުކުރާ މަނަވަރަކީ ކަނޑުއަޑީގެ ސީބެޑް ޗާޓް ކުރެހުމާއި ސީބެޑްގައިވާ މިނެރަލްސްތައް ދެނެގަތުމުގެ ކުޅަދާނަކަން ލިބިފައިވާ މަނަވަރެއްކަމަށެވެ. 
މި މަނަވަރުގެ ދަތުރުގައި ރާއްޖޭގެ ބަދަލުގައި ފުރަތަމަ ޖައްސަން އޮތީ ސްރީލަންކާގައެވެ. އެހެންނަމަވެސް އިންޑިއާއިން ސްރީލަންކާއަށް ފިއްތުންތައް ކުރިމަތިކުރުމުން އެގައުމުންވަނީ އެއް އަހަރު ދުވަހަށް އެގައުމަށް މި މަނަވަރު ދަތުރުނުކުރާގޮތަށް މުއްދަތެއް ކަނޑައަޅައިދީފައެވެ. ދިވެހިރާއްޖެއަށް އިންޑިއާގެ ނުތަނަވަސްކަން ހުށަހެޅުމުން ދިވެހިރާއްޖެއިން ބުނެފައިވަނީ އިންޑިއާއިން ކަންބޮޑުވުން ފާޅުކޮށްފައި ހުރި ކަންކަން ރާއްޖޭގެ ކަނޑުގެ ސަރަހައްދުގައި މިމަނަވަރުން ނުހިންގާނެ ކަމަށެވެ. ރަހުމަތްތެރި ގައުމުތަކުގެ މަނަވަރުތަކަށް މިފަދަ ދަތުރުތަކުގައި ރާއްޖެއައުމަށް ފުރުސަތު އަބަދުވެސް އޮންނަކަމަށްވެސް ބުނެފައި ވެއެވެ.

އެހެންނަމަވެސް އިންޑިއާގެ ނޫސްތަކުން މިއަދު ބުނީ ރާއްޖޭގެ ސަރަހައްދުގެތެރެއިން މި މަނަވަރު ދަތުރުކުރަމުންދިޔައީ ވަރަށް ޝައްކު އުފެދޭގޮތަށް ގުދުގުދުލައްވަމުންނެވެ.