ބިންވެރިޔާ ސްކީމްގެ ދަށުން އެގްރީމަންޓްގައި ސޮއިކޮށް 8000 އަށްވުރެ ގިނަ މިހުންނަށް ގޯތީގެ ރަޖިސްޓަރީ ހަވާލު ކޮށްފިއެވެ.

ގެދޮރުވެރިކަމާއި އުމްރާނީ ތަރައްގީއާ ބެހޭ ވުޒާރާއިން މިއަދު "ބިންވެރިޔާ ސްކީމް" ގެ ދަށުން މާލެ ސަރަހައްދުން ދޫކުރުމަށް ހަމަޖެހިފައިވާ ބިންތަކާ ގުޅޭ ގޮތުން ނެރުނު ނޫސް ބަޔާނެއްގައި ވަނީ ގޯތި ދޫކުރުމުގެ މަސައްކަތް ކުރިޔަށް ގެންގޮސްފައިވާ ގޮތުގެ ތަފްސީލް ހިއްސާ ކޮށްފައެވެ. 

އޭގައިވާގޮތުން މިހާތަނަށް އެގްރީމަންޓްގައި ސޮއިކޮށް 8250 ފަރާތަކާއި ވަނީ ރަޖިސްޓްރީ ހަވާލު ކޮށްފައެވެ. އަދި ބިން ލިބިފައިވާކަމުގެ ލިޔުން 118 ފަރާތަކާ ވަނީ ހަވާލު ކުރެވިފައެވެ. 

މީގެ އިތުރުން ބިން ލިބިފައިވާކަމުގެ ލިޔުން ހަވާލު ނުކުރާ 303 މީހުން ތިބި އިރު އެޕްލިކަންޓ/ އެޕްލިކަންޓުން ބިން ދޫކޮށްލަން އެދިފައިވާތީ 16 ފަރާތަކާއި ސޮއި ނުކުރެވި ވާ ކަމަށާ،

އެޕްލިކަންޓް/އެޕްލިކަންޓުން ނިޔާވުމުގެ ސަބަބުން ސޮއި ނުކުރެވި ހުރި 12 ފަރާތަކާއިއިތުރަށް ބަލަންޖެހޭ ކަންކަން ހުރުމުގެ ސަބަބުން ސޮއި ނުކުރެވި ހުރި 120 ފަރާތެއް ހުރި ކަމަށް ބުނެފައިވެއެވެ. 

އަދި އެގްރީމަންޓް ސޮއިކޮށް 212 ފަރާތަކާއި ރަޖިސްޓަރީ ހަވާލު ކުރުމުގެ މަސައްކަތް ކުރިޔަށްގެންދާ ކަމަށާ ގިނަ ފަރާތްތަކަށް ސޮއިކުރުމަށް ދެވަނަ ފުރުޞަތުވެސް ދެވިފައި ވާކަން އެ މިނިސްޓްރީން ފާހަގަކޮށްފައިވެއެވެ.

މީގެ އިތުރުން ހައުސިންގް މިނިސްޓްރީން ބުނީ، "ބިންވެރިޔާ ސްކީމް"ގެ ދަށުން ބިންތަކުގެ އެގްރީމަންޓްގައި ސޮއިކޮށް ރަޖިސްޓްރީ ހަވާލު ކުރުމުގެ އިތުރުން ގޯތި ލިބިފައިވާކަމުގެ ލިޔުން ހަވާލު ކުރެވިފައިނުވާ ފަރާތްތަކަށް ގުޅުމުގެ މަސައްކަތް ކުރަމުން ގެންދާ ކަމަށެވެ. 

އަދި ބިން ލިބޭ ފަރާތަކަށް އެ މިނިސްޓްރީން ގުޅާނީ މިނިސްޓްރީގެ ހޮޓްލައިން ނަންބަރު 4004994 އަދި 4004797 އިން ކަމުގައިވެސް ބުނެފައިވެއެވެ.