ކުވެއިތު ފަންޑުން ހދ. ހަނިމާދޫ ހޮސްޕިޓަލް އެޅުމަށް ދިން އެހީ، އަނބުރާ ގެންދިޔައީ ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުން ކަން ކުރެއްވި ގޮތުން ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ. 

ރައީސުލްޖުމްހޫރިއްޔާ މިހެން ވިދާޅުވީ މިއަދު ހެނދުނު ހަނިމާދޫ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.

އެ ޖަލްސާގައި ވާހަކަ ދައްކަވަމުން ރައީސުލްޖުމްހޫރިއްޔާ ޑރ މުޢިއްޒު ވިދާޅުވީ، ހަނިމާދޫއާއި އަދި އިތުރު ދެރަށެއްގެ 30 އެންދުގެ ހޮސްޕިޓަލް ތަރައްޤީކުރުމުގެ މަޝްރޫޢުގައި ކުރިން ސޮއިކޮށްފައި އޮތީ ކުވޭތު ފަންޑުގެ ހިލޭ އެހީގެ ދަށުން އެ މަސައްކަތްކުރުމަށް ކަމަށެވެ.

Advertisement

ނަމަވެސް ކުރީގެ ސަރުކާރުގެ އިހުމާލުން އެ ފަންޑު ދޫކުރި ފަރާތުން ފަންޑު އަނބުރާ ގެންގޮސް، އެ މަޝްރޫޢު ކުރިއަށް ގެންދެވޭގޮތްނުވެ އޮތްކަމަށެވެ.

މިއާއެކު ރައީސް ވިދާޅުވީ ބޭރުގެ އެފަދަ ފަންޑު ތަކުން  ފައިސާ ދިނުމުގައި އުސޫލެއް ގެންގުޅޭ ކަމަށާ، އެކަމުގައި ފުރުހަމަ ކުރަންޖެހޭ މަރުހަލާ ތަކެއް ހުންނަ ކަމަށެވެ. ނަމަވެސް މަރުހަލާތައް ފުރިހަމަ ކުރުމުގައި ކުރީ ސަރުކާރުން ފަރުވާ ކުޑަ ކޮށްފައިވާ ކަމަށާ، އޭޭގެ ސަބަބުން އެ ފަންޑު އަނބުރާ ގެންގޮސްފައިވާ ކަމަށް އެމާނިކުފާނު ވިދާޅުވި އެވެ. 

ރައީސުލްޖުމްހޫރިއްޔާ ވިދާޅުވީ މި ސަރުކާރުން ހަނިމާދޫ އާއި އަނެއް ދެ ރަށުގައި ވެސް ރަނގަޅު ފެންވަރުގެ ހޮސްޕިޓަލެއް ގާއިމުކޮށްދެއްވާނެ ކަމަށާއި އެ މަޝްރޫޢު ކުރިއަށް ގެންދާނީ ސަރުކާރުގެ ސަރަހައްދީ ތަރައްޤީގެ ސިޔާސަތުގެ ދަށުން، އެވިސްނުމުގައި ކަމަށެވެ.