ރައްޔިތުންގެ މަޖިލީހުގެ ޖުމްލަ މެމްބަރުންގެ އަދަދު ގުނާއިރު, ހުސް ގޮނޑިތައް ނުލާ ގޮތަށް، މަޖިލީހުގެ ގަވާއިދު ބަދަލުކޮށްފައިވަނީ ގާނޫނު އަސާސީއާއި ޚިލާފަށް ކަމަށް ސްޕްރީމް ކޯޓުން މިއަދު ނިންމައިފިއެވެ. 

މަޖިލީހުގެ ޖުމްލަ މެންބަރުންގެ އަދަދު ގުނާ ގޮތަށް ގެނައި ބަދަލަކީ ގާނުނު އަސާސީއާއި ޚިލާފަށް ގެނައި ބަދަލެއް ކަމަށް ބުނެ، އެ މައްސަލަ ސްޕްރީމް ކޯޓަށް ހުށަހެޅީ ދައުލަތުގެ ބަންޑާރަނައިބުގެ ފަރާތުންނެވެ. 

އެ މައްސަލައިގެ ހުކުމް ކުރުން މިއަދު އޮތް އިރު، މައްސަލައިގެ ރިޔާސަތުގައި އިންނެވި، ފަނޑިޔާރު ޑރ. އަޒްމިރަލްދާ ޒާހިރު ވިދާޅުވީ، ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދު ގުނާއިރު ހުސްވެފައިވާ ގޮނޑިތައް ނުލައި ގުނުމަށް، މަޖިލީހުން ގަވާއިދަށް އިސްލާހު ގެނެސްފައިވަނީ ގާނޫނު އަސާސީއާ އެއްގޮތްވާ ގޮތުގެ މަތީން، "ހެޔޮ ނިޔަތުގައި ކަމަށް ގަބޫލުކުރަން ދަތި" ކަމަށެވެ. 

އަދި މައްސަލާގެ ހުކުމް އިއްވަމުން މަޖިލީހުން މެންބަރުންގެ އަދަދު ގުނާ ގޮތަށް ބަދަލު ގެންނަން ނިންމި ނިންމުމާއި ގުޅިގެން ފަސް ކަމެއް ފަނޑިޔާރު އަޒްމިރަލްދާ ވަނީ ފާހަގަކުރައްވާފައެވެ. 

އެއީ؛

1) 19 ވަނަ ރައްޔިތުންގެ މަޖިލީހުގައި އިސްތިއުފާ ތިން މެންބަރުންގެ ދާއިރާތައް ނުހިމަނައި، މަޖިލީހުގެ ޖުމްލަ އަދަދު ގުނުމަކީ، ގާނޫނު އަސާސީގެ 71 ވަނަ މާއްދާގެ ދަށުން މެންބަރުންގެ އަދަދު ކަނޑައަޅާ އުސޫލަށާއި، 72 ވަނަ މާއްދާގެ ދަށުން އިންތިޚާބީ ދާއިރާތައް ތަމްސީލް ކުރެވޭ ގޮތަށާއި، 26 ވަނަ މާއްދާގެ (ނ) ގެ ދަށުން މަންދޫބަކު މެދުވެރިކޮށް ރައްޔިތުންގެ ކަންކަން ހިންގުމުގައި ބައިވެރި ވުމުގެ ހައްގަށާއި، އަދި 4 ވަނަ މާއްދާގެ ދަށުން ރައްޔިތުންގެ ބާރުވެރިކަން އޮތުމާއި ޚިލާފް ކަމެއް ކަން. 

2) ގާނޫނު އަސާސީގެ 78 ވަނަ މާއްދާ އަކީ ރައްޔިތުންގެ މަޖިލީހުގެ އުމުރު ހަމަވުމަށް 6 މަސްދުވަސް ނުވަތަ އެއަށްވުރެ ކުރު މުއްދަތެއްގައި ހުސްވާ ގޮނޑިތަކެއް ނުހިމަނައި މަޖިލީހުގެ ޖުމްލަ އަދަދު ގުނުމަށް ފަހިކޮށްދޭ މާއްދާއެއް ނޫންކަން. 

3) ގާނޫނު އަސާސީގައި ބަޔާންކުރާ ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދު، ހުސް ގޮނޑިތައް ނުހިމެނޭ ގޮތަށް ރައްޔިތުންގެ މަޖިލީހުން ނިންމުމުގެ ނަތީޖާ އަކީ، ގާނޫނު އަސާސީގައި ރައްޔިތުންގެ މަޖިލީހުން ފާސްކުރަންޖެހޭ ކަންކަން ބަޔާން ކުރާ، މާއްދާތަކުގައި، ގާނޫނު އަސާސީން އެކި ކަންކަން ލިބިދީފައިވާ ހިމާޔަތް ބަލިކަށިވެ، ގާނޫނު އަސާސީގެ އޮނިގަނޑު ވަކި ގޮތަކަށް އޮތް އޮތުން ނިއުޅެވިގެންދާ ކަމެއްކަން. 

4) ރައްޔިތުންގެ މަޖިލީހަށް ގަވާއިދު ހެދުމުގެ ބާރު ލިބެނީ ގާނޫނު އަސާސީއާއި ޚިލާފް ނުވާ ގޮތަކަށް ކަމަށް ވާއިރު، މަޖިލީހުގެ އިސްތިއުފާ ދިން މެންބަރުންގެ އަދަދު ނުހިމަނައި، މެންބަރުންގެ ޖުމްލަ މެންބަރުންގެ އަދަދު ގުނުމަށް ނިންމާފައިވާނީ މަޖިލީހަށް ގަވާއިދު ހެދުމަށް ލިބިފައިވާ ހުދޫދުގެ ބޭރުން. 

5) މަޖިލީހުގެ ގަވާއިދުގެ 40 ވަނަ މާއްދާއަށް ގެނެވުނު އިސްލާހު މިހާރު އެ މާއްދާއިން އުނި ކޮށްފައިވާތީ އެކަމަށް އެޅޭނެ ފިޔަވަޅެއް ނެތް ކަން. 

ފަނޑިޔާރު އަޒްމިރަލްދާ ގެ ނިންމެވުމަށް ފަނޑިޔާރުންގެ ބެންޗުގައި ތިއްބެވި، ފަނޑިޔާރު ޢާއިޝާ ޝުޖޫން އާއި، ފަނޑިޔާރު މަހާޒް އަލީ ޒާހިރާއި، ފަނޑިޔާރު ހުސްނުއްސުޢޫދު އަދި ފަނޑިޔާރު ޑރ. މުހައްމަދު އިބްރާހީމް ވަނީ ތާއީދު ކުރައްވާފައެވެ.