ޞިއްޙީ އިމަޖެންސީ ޙާލަތްތަކުގައި ބަލިމީހުން އުފުލުމަށްޓަކައި ބޭނުންކުރާ އެއާ އެމްބިއުލާންސް ގައި އަވަސް ޞިއްޙީ ފަރުވާ ދިނުމަށް ބޭނުންވާ ވަސީލަތްތައް ހުންނާނެ ކަމަށް ސަރުކާރުން ބުނެފިއެވެ. 

އެއަރއެމްބިއުލާންސް ޚިދުމަތް ފެށުމާއި ގުޅިގެން ސިއްހީ ވުޒާރާއިން ނެރުނު ނޫސް ބަޔާނެއްގައި ބުނީ މިއަދު ޚިދުމަތް ދޭން ފެށި ބޯޓުގައި މެޑިކަލް އިމަރޖެންސީގެ ޙާލަތްތަކުގައި، ރާއްޖޭގެ އެކި ކަންކޮޅުތަކުން ފަރުވާ ލިބެންހުރި އެންމެ ކައިރި ޓާރޝަރީ ހޮސްޕިޓަލަކަށް ބަލިމީހުން އުފުލުމުގައި އަވަސް ޞިއްޙީ ފަރުވާ ދެވޭގޮތަށް ވަސީލަތްތަކާއިއެކު ތަމްރީން ކޮށްފައިވާ 15 ޞިއްޚީ ޚިދުމަތްތެރިއަކު ހަރަކާތްތެރިވާނެ ކަމަށެވެ. 

އޭގެތެރޭގައި ޑޮކްޓަރުންނާއި ނަރުހުން އަދި އެމަޖެންސީ މެޑިކަލް ޓެކްނީޝަނުން ހަރަކާތްތެރިވާނެކަންވެސް ފާހަގަކޮށްފައިވެއެވެ. 

Advertisement

ރާއްޖޭގެ ޞިއްޙީ ދާއިރާ ހަރުދަނާކޮށް ރައްޔިތުންނަށް ލުއިފަސޭހަ ޚިދުމަތްތަކެއް ދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތުތަކުގެ ތެރޭގައި ހިމެނޭ އެންމެ މުހިންމު އެއް ސިޔާސަތެވެ. އެގޮތުން އެއަރ އެންބިއުލަންސް ޚިދުމަތް ސަރުކާރުގެ ވައުދުތަކުގެ ދަށުން މިއަދު ފެށިގެން ގޮސްފައި ވާއިރު، މި މަސައްކަތުގެ މައިގަނޑު އަމާޒަކީ، ހަރުދަނާ އަދި ދެމެހެއްޓެނިވި ގޮތެއްގައި އެއަރ އެމްބިއުލާންސްގެ ޚިދުމަތް ރާއްޖޭގައި ގާއިމުކުރުން ކަމަށް ސިއްހީ ވުޒާރާއިން ބުނެއެވެ.

މިއާއެކު އެ ވުޒާރާއިން ބުނި ގޮތުގައި އެއަރއެމްބިއުލާނސްގެ ޚިދުމަތަށް ޚާއްސަކުރެވިފައިވާ DHC-8-200 މިބޯޓާއެކު ޚިދުމަތް ފެށުމުން ރާއްޖޭގެ ހުރިހާ ސަރަހައްދަކަށް 24 ގަޑިއިރު މިޚިދުމަތް ފޯރުކޮށްދެވިގެންދާނެއެވެ.

އަދި މިހާރު މާލެ ޞަރަހައްދުގައި ޤާއިމްކުރެވިފައިވާ މޯލްޑިވްސް އިމަރޖެންސީ މެޑިކަލް ސަރވިސަސްގެ ނިޒާމްގެ ތެރެއަށް އެއަރ އެމްބިއުލަންސްގެ ޚިދުމަތް ހިމެނި، ޕްރީ ހޮސްޕިޓަލް ކެއަރ ކޯޑިނޭޓްކުރުމުގެ އިންތިޒާމް ރާވާ، ދެމެހެއްޓެނިވި ގޮތެއްގައި އަވަސް ފަރުވާގެ ނިޘާމް ފުރިހަމަ ނިޒާމެއްގެ ގޮތުގައި ޤާއިމްކުރެވި ކުރިއަށް ގެންދެވޭނެކަންވެސް ފާހަގަކޮށްފައިވެއެވެ. 

އެއަރ އެމްބިއުލާންސްގެ ޚިދުމަތް ދޭނީ މިނިސްޓްރީ އޮފް ހެލްތާއި އައިލެންޑް އޭވިއޭޝަން އަދި އެންސްޕާއާ ގުޅިގެންނެވެ.