އެއާ އެމްބިއުލާންސްގެ ގޮތުގައި ބޭނުންކުރުމަށް ތައްޔާރުކުރެވުނު މަތިންދާ ބޯޓަކީ ސަލާމަތީ ގޮތުން ރައްކާތެރި ބޯޓެއް ކަމުގެ ޔަގީންކަން ގައުމީ އެއާލައިން, މޯލްޑިވިއަން އިން ދީފިއެވެ.

ދިވެހިރާއްޖޭގައި ފުރަތަމަ ފަހަރަށް އެއާ އެމްބިއުލާންސްގެ ހިދުމަތް މިއަދު ފަށާފައިވާއިރު، އެ ބޯޓުގެ ސަލާމަތީ ކަންކަމާއި މެދު ބައެއް ފަރާތްތަކުން އަންނަނީ ސުވާލު އުފައްދަމުންނެވެ. 

އެއާއި ގުޅިގެން މޯލްޑިވިއަން އިން މީސްމީޑިއާގައި ކުރި ޕޯސްޓެއްގައި ބުނީ، އެއަރ އެމްބިއުލާންސްގެ ގޮތުގައި ބޭނުންކުރުމަށް ތައްޔާރުކުރެވުނު މަތިންދާ ބޯޓަކީ ސަލާމަތީ ގޮތުން ރައްކާތެރި ބޯޓެއް ކަމަށެވެ. އަދި އެއަރ އެމްބިއުލާންސްގެ ގޮތުގައި ބޭނުންކުރުމަށް ބަދަލުތައް ގެނައުމުގެ ކުރިން އެބޯޓަކީ އެ ކުންފުނީގެ ޝެޑިއުލް ފްލައިޓްތައް އޮޕަރޭޓްކުރުމަށް ބޭނުންކުރަމުން ދިޔަ ބޯޓެއް ކަންވެސް ފާހަގަކޮށްފައިވެއެވެ.

މިއާއެކު މޯލްޑިވިއަން އިން ބުނީ، އެއަރ އެމްބިއުލާންސްގެ ގޮތުގައި ބޯޓް ތައްޔާރުކުރެވިފައިވަނީ އެމަޖެންސީ ފަރުވާ އޭަގައި ދެވޭ ގޮތަށް، މެޑިކަލް އިކުއިޕްމަންޓްތައް ހަރުކޮށް ގެން ކަމަށެވެ.

އެއާ އެންބިއުލާންސްގެ ހިދުމަތް ތައާރަފު ކުރުމާއި ފުޅާ ކުރުމަކީ ރައީސް މުއިއްޒުގެ ވައުދެކެވެ. ރައީސް ތަސައްވުރަކީ ރާއްޖެއާއި ރާއްޖެއިން ބޭރަށް އެއާ އެންބިއުލާންސްގައި ބަލިމީހުން ފަސޭހައިން އުފުލޭނެ އިންތިޒާމެއް ހަމަޖެއްސުމެވެ.

އަދި އެއާ އެމްބިއުލާންސް ގެ ހިދުމަތް ފުޅާކުރުމުން ފުލް ޓައިމު ގައި އޮޕަރޭޓް ކުރާނެ ދެ ބޯޓެއް އޮންނާނެ ކަމަށްވެސް ރައީސް މުޢިއްޒު ވިދާޅުވިއެވެ. 

މީގެ އިތުރުން މޯލްޑިވިއަންގެ އެއާ އެމްބިއުލާންސް ގެ އިތުރުން، ސީޕްލޭންވެސް ބަލި މީހުން އުފުލުމަށް ބޭނުން ކުރަމުން އަންނާނެ ކަމަށް ސަރުކާރުން ބުނެފައިވެއެވެ.