ޅ.ހިންނަވަރަށް ހޯދައިދޭން ޖެހޭ ހައްގު ހޯދަދެއްވާނެ ކަމަށާއި، ހިންނަވަރަށް މިހާތަނަށް ހަގީގަތަކަށް ނުވެ ގޮސްފައިވާ ހުރިހާ މަސައްކަތެއް ހަގީގަތަކަށް ހައްދަވައިދެއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒު މިފަދައިން ވިދާޅުވީ ޅ އަތޮޅު ހިންނަވަރަށް ވަޑައިގެން، އެ ރަށުގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުންނެވެ.
"ކޮންމެ ރައްޔިތަކު ކިތަންމެ އާބާދީ ކުޑަ ރަށެއްގައި ހުއްޓަސް، ކިތަންމެ އާބާދީ ބޮޑު ރަށެއްގައި ހުއްޓަސް އަޅުގަނޑަށް މުހިންމު. ހިންނަވަރުގަ މިހާތަނަށް ހަގީގަތަކަށް ނުވެ ގޮސްފައިވާ ހުރިހާ މަސައްކަތެއް އަޅުގަނޑު އިރާދަކުރެއްވިއްޔާ ހަގީގަތަކަށް ހަދައި ހިންނަަވަރަށް ހޯދަދޭންޖެހޭ ފުރިހަމަ ހައްގު ހޯދަދޭނަން."
ރައީސް ޑރ.މުއިއްޒު ވިދާޅުވިއެވެ.
ރައީސް ޑރ.މުއިއްޒު ވިދާޅުވީ ހިންނަވަރަކީ ވަކި ބަޔަކު އެ މީހުންގެ މިލްކެއްގެ ގޮތުގައި ދެކޭ ރަށެއް ކަމަށާއި ނަމަވެސް އެރަށުގެ ރައްޔިތުންގެ އުއްމީދުތައް ހަގީގަތަކަށް ނުވެ އެތައް ޒަމާނެއް ހޭދަވެގެން ގޮސްފައިވާ ކަމަށެވެ. އެހެންނަމަވެސް މި ސަރުކާރުން ހިންނަވަރު ރައްޔިތުންގެ އުއްމީދުތައް ހަގީގަތަކަށް ހަދައިދީ އެރަށަށް ފުރިހަމަ ހައްގު ހޯދައިދޭނެ ކަމަށް ރައީސް ޑރ.މުއިއްޒު ވިދާޅުވިއެވެ.
މީގެ އިތުރުންވެސް ރައީސް ޑރ.މުއިއްޒު ވަނީ ކޮންމެ ސިޔާސީ ވިސްނުމެއްގެ މީހެއް ކަމަށް ވިޔަސް، އެމަނިކުފާނުގެ ކުރިމަތީގައި ހުރިހާ ދިވެހި ރައްޔިތުން ހަމަހަމަ ކަމަށާއި އެ މީހެއްގެ ސިޔާސީ ވިސްނުމަކީ އެމަނިކުފާނަށް މުހިންމު އެއްޗެއް ނޫންކަމަށެވެ.
"ކޮންމެ ސިޔާސީ ވިސްނުމެއްގެ މީހެއް ކަމަށް ވިޔަސް، އަޅުގަނޑު ކުރިމަތީގައި ހުރިހާ ދިވެހި ރައްޔިތުން ހަމަހަމަ. އެ މީހެއްގެ ސިޔާސީ ވިސްނުމަކީ އަޅުގަނޑަކަށް މުހިއްމު އެއްޗެއް ނޫން."
ރައީސް ޑރ.މުއިއްޒު ވިދާޅުވިއެވެ.
ރައީސް ޑރ.މުއިއްޒު ވިދާޅުވީ، ހިންނަވަރުގައި ފަށައި ނުނިމި ހުރި މަސައްކަތްތަކާއި އަލަށް ފަށަން ނިންމާފައިވާ މަސައްކަތްތައް މި ދައުރުގައި ނިންމައިދޭނެ ކަމުގެ ޔަގީންކަން ދެއްވާ ކަމަށާއި ހިންނަވަރުގައި މިހާރު ގާއިމުކޮށްފައިވާ އޭޓީއެމަށްވުރެ ހިދުމަތް ފުޅާކޮށް އެ ހިދުމަތްވެސް ދިނުމުގެ އިތުރުން، އެރަށުގައި ހިއްކާފައިވާ ސަރަހައްދުގެ މަގުތަކާއި ފެނާއި ނަރުދަމާގެ މަޝްރޫއުވެސް ކުރިއަށް ގެންދަވާނެ ކަމަށެވެ.
Advertisement
This content is created and paid for by advertisers and does not involve Voice Journalists
