ސަރުކާރުން މަސްވެރިންނަށް ދޭން ޖެހޭ ހުރިހާ ފައިސާއެއް ދޫކޮށް، މަސްވެރިންގެ ބެކްލޮގް އެއްކޮށް ފިލައިފި ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރޭގައި ރައީސް ޑރ.މުއިއްޒު އެކްސް ގައި ކުރެއްވި ޕޯސްޓެއްގައި ވިދާޅުވީ، އިއްޔެ އާއި ހަމައަށް މަސްވެރިންނަށް ދެވުނު ފައިސާ އާއި އެކު މަސްވެރިން މިދިޔަ ހުކުރު ދުވަހާއި ހިސާބަށް ބޭނި ހުރިހާ މަހަށް ފައިސާދީ، މަސްވެރިންގެ ބެކްލޮގް އެއްކޮށް ފިލުވާލެވިފައިވާ ކަމަށެވެ.

ރައީސް ޑރ.މުއިއްޒު ވަނީ މީގެ ކުރިންވެސް މަސްވެރިންނަށް ސަރުކާރުން ދޫކުރަންޖެހޭ ފައިސާގެ ތެރެއިން ބާކީ ނުދެވި ހުރި ފައިސާ، ރަމަޟާން މަހުގެ ކުރިން ދިނުމަށް މަސައްކަތްޕުޅު ކުރައްވަމުން އަންނަ ކަމަށް ވިދާޅުވެފައެވެ. އަދި މި ފައިސާ ދޫކުރުމަށްފަހު،  ދެން އެމަނިކުފާނު ވައުދުވެވަޑައިގެންނެވި ފަދައިން 48 ގަޑި އިރު ތެރޭގައި، މަސްވެރިން ބާނާ މަހަށް ފައިސާ ދޫކުރާނެ ކަމަށް ވެސް ރައީސް ޑރ.މުއިއްޒު ވަނީ ވިދާޅުވެފައެވެ.

މަސްވެރިންނަށް ދޫކުރަން ޖެހޭ ފައިސާ ދޫކުރުން ލަސްވުމާއި ގުޅިގެން މަސްވެރިން ވަނީ ކޫއްޑޫގައި އިހުތިޖާޖް ވެސް ކޮށްފައި ކަން ފާހަގަކޮށްލަން ޖެހެއެވެ.

މި ސަރުކާރުން ރާއްޖޭގެ ވެރިކަމާއި ހަވާލުވިއިރު، މަސްވެރިންނަށް ގާތްގަނޑަކަށް 200 މިލިއަން އަށް ވުރެ ގިނަ ރުފިޔާ ސަރުކާރުން ވަނީ ދޭން ޖެހިފައެވެ. މި ރުފިޔާތައް ސަރުކާރުން މަސްވެރިންނަށް ދޫކޮށް ނިންމާފައިވާއިރު، މަސްވެރިންނަށް ބަރާބަރަށް ފައިސާ ދިނުމަށްޓަކައި ސަރުކާރުން ވަނީ މަސްގަންނަ އަގު 25 ރުފިޔާ އިން 20 ރުފިޔާ އަށް ދަށް ކޮށްފައެވެ.

މިކަމާއި ގުޅިގެން މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހްމަދު ޝިޔާމް ވިދާޅުވީ އަގު ދަށްކުރީ، މަސްވެރިންނާއި މިފްކޯ ސަލާމަތުން ބޭއްވުމަށްޓަކައި ކަމަށާއި، މި ބަދަލަކީ މަސްވެރިން މިއަދު ތިބި ހާލަތު ބަދަލު ކުރުމަށް ގެނެވުނު ބަދަލެއް ކަމަށެވެ. އަދި ދައުލަތަށް ކެތްވާ އަގެއްގައި މަސް ގަންނަ ޖެހޭ ކަމަށް މަސްވެރިން ވެސް ގަބޫލުކުރާ ކަމަށާއި މަސްވެރިންނަށް ނުދެވޭ އަގެއްގައި މަސް ގަނެގެން މަސްވެރިން ނިކަމެތި ކުރުމުގެ ވިސްނުމެއް ސަރުކާރުގެ ނެތް ކަމަށް ވެސް ޝިޔާމް ވިދާޅުވިއެވެ.

މަސްވެރިކަމުގެ ސިނާއަތަށް އިންގިލާބީ ބޮޑެތި ބަދަލުތަކެއް ގެނައުމަކީ ރައީސުލްޖުމްހޫރިއްޔާ ޑރ.މުއިއްޒުގެ ރިޔާސީ ވައުދުތަކުގެ ތެރޭގައި ހިމެނިވަޑައިގަންނަވާ ކަމަށް ވާއިރު، ވެރިކަމާއި ހަވާލުވެ ވަޑައިގަތުމަށް ފަހު މަސްވެރިކަމުގެ ސިޔާއަތު ކުރިއެރުވުމަށްޓަކައި އެންމެ އިސްކަންދީގެން ކުރައްވާނެ ގިނަ ކަންތައްތަކެއް ސަރުކާރުގެ ހަފްތާ-14 މަގުޗާޓުގައި ވެސް ވަނީ ހިމަނުއްވާފައި ވެއެވެ.