އޭއެފްސީ ޗެންޕިއަންސް ލީގު ކުއާޓާ ފައިނަލުގެ ދެވަނަ ލެގުގައި އަންގާރަދުވަހުގެ ރޭ ރަށުން ބޭރުގައި 2-0 ގެ ނަތީޖާއަކުން އަލް އިއްތިހާދު ބަލިކޮށް އަލް ހިލާލުން ޖެހިޖެހިގެން 28 މެޗުން މޮޅުވެ ރެކޯޑް ހަދައިފި އެވެ.

މީގެ ކުރިން މިރެކޯޑް އޮތީ ވޭލްސްގެ ޕްރެމިއާ ލީގު ކުލަބް ދަ ނިއު ސައިންޓް އަތުގައެވެ. އެޓީމުން ވަނީ 2016/17 ވަނަ ސީޒަނުގައި ޖެހިޖެހިގެން 27 މެޗުން މޮޅުވެފައެވެ. 

ސައުދީ ޕްރޮފެޝަނަލް ލީގުގެ އެއްވަނާގައި 12 ޕޮއިންޓްގެ ލީޑަކާއެކު މިވަގުތު އޮތް އަލް ހިލާލުން ވަނީ ލީގުގައި އެޓީމުން އެންމެ ފަހުން ކުޅުނު 16 މެޗުން މޮޅުވުމުގެ އިތުރުން ޑޮމެސްޓިކް މުބާރާތްތަކުގައި ކުޅުނު ތިން މެޗުގެ އިތުރުން އޭއެފްސީ ޗެންޕިއަންސް ލީގުގައި އެޓީމުން އެންމެ ފަހުން ކުޅުނު 8 މެޗުން މޮޅުވެފައެވެ.

Advertisement

މީގެ އިތުރުން މިސީޒަނުގައި ވާދަވެރި މެޗެއްގައި އެޓީމު ބަލިވެފައި ވަނީ އެންމެ މެޗަކުންނެވެ. އެއީ ޢަރަބި ޗެންޕިްއަންސް ކަޕްގެ ފައިނަލުގައި 2-1 ގެ ނަތީޖާއަކުން އަލް ނަސްރު އަތުން ބަލިވި މެޗު އެކަންޏެވެ.

އަލް ހިލާލުން މިސީޒަނުގައި ހޯދަމުން އަންނަ ކާމިޔާބީތަކުގެ އެންމެ މުހިންމު ދައުރެއް އަދާކުރާ އެއް ކުޅުންތެރިއަކީ ޕްރެމިއާ ލީގުގެ ފުލަމްގައި މޮޅު ކުޅުމެއް ދެއްކި ސާބިއާގެ ފޯވާޑް އެލެގްޒެންޑަރ މިޓްރޮވިޗް އެވެ. އޭނާ ވަނީ މި ސީޒަނުގައި އެޓީމަށް ކުޅެދިން 28 މެޗުގައި 29 ލަނޑު ކާމިޔާބުކޮށްފައެވެ.

މީގެ އިތުރުން ވެސް އެޓީމުގެ މެދުތެރޭގައި ޕޯޗުގަލްގެ މިޑްފީލްޑަރު ރުބެން ނެވޭސްގެ އިތުރުން ސާބިއާގެ މިޑްފީލްޑަރު ސާޖް މިލިންކޮވިޗް-ސަވިޗް މޮޅު ކުޅުމެއް ދައްކަމުން އަންނަ އިރު، ފަހަތުގައި ސެނަގާލް ޑިފެންޑަރު ޚާލިދް ކުލިބަލީ އަންނަނީ ތަފާތު މޮޅު ކުޅުމެއް ދައްކަމުންނެވެ.