ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް ކުރިން އެ މަގާމުގައި ހުންނެވި ޔަޒީދު މުހައްމަދާއި  ކުރީގެ ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަން ހަސަން ޒަރީރުގެ ނަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންގެ މަޖިލީހަށް ފޮނުއްވައިފިއެވެ.

މި ދެބޭފުޅުންގެ ނަން މަޖިލީހަށް ރައީސް ޑރ.މުއިއްޒު ފޮނުއްވި ސިޓީގައި، ކޮމިޝަނަ ޖެނެރަލް އޮފް ޓެކްސޭޝަންގެ މަގާމަށް އާންމުކޮށް ހުޅުވައިލުމުން، ކުރިމަތިލެއްވި ބޭފުޅުންގެ ތެރެއިން އެ މަގާމަށް ޝަރުތު ހަމަވާ ބޭފުޅުންނަކީ ޔަޒީދު އަދި ޒަރީރު ކަމަށް ވާތީ، އެ މަގާމަށް މި ދެ ބޭފުޅުން އައްޔަނުކޮށްދިނުމަށް ވަނީ އެދިވަޑައިގެންފަ އެވެ. އެއާއިއެކު، މަޖިލީހުގެ ރިޔާސަތުން ވަނީ، އެ ދެ ބޭފުޅުންގެ ނަން ދިރާސާކުރުމަށް އިގްތިޞާދީ ކޮމިޓީއަށް ފޮނުވައިފަ އެވެ.

ޔަޒީދާއި ޒަރީރަށް މީގެ ކުރިން މަގާމް ގެއްލުނީ، ކުރީ ސަރުކާރުން 2019 ވަނަ އަހަރު ޓެކްސް ނެގުމާ ބެހޭ އިދާރީ ގާނޫނަށް ގެނައި އިސްލާހަކާ ގުޅިގެންނެވެ. މި އިސްލާހުގައި ވާގޮތުން، ގާނޫނަކަށްވެ އަމަލު ކުރަން ފަށާ ތާރީހުން ފެށިގެން އެއް މަސް ދުވަސް ތެރޭގައި ކޮމިޝަނާ ޖެނެރަލް އޮފް ޓެކްޒޭޝަން އާއި ޑެޕިއުޓީ ކޮމިޝަނާ ޖެނެރަލް އޮފް ޓެކްޒޭޝަންގެ މަގާމަށް އަލުން މީހަކު އައްޔަން ކުރަން ޖެހޭއިރު، އެ މުއްދަތުގެ ތެރޭގައި މީރާގެ ބޯޑު އަލުން އެކުލަވައިލަން ޖެހެނޭ އެވެ.

އޭރުގެ ރައީސް މި ބިލު ތަސްދީގުކުރައްވާ، މި މަގާމަށް ކުރިމަތިލުމަށް ހުޅުވާލެއްވުމުން، މި ދެބޭފުޅުން އޭރު މި މަގާމަށް ކުރިމަތިލާފައެއް ނުވެއެވެ.