ގައުމިއްޔަތުގެ ނަމުގައި މި ސަރުކާރުން ދަނީ "ފިތުނައިގެ އޮށް" އިންދަމުން ކަމަށް އެމްޑީޕީގެ ރައީސް އަބްދުالله ޝާހިދު ވިދާޅުވެއްޖެއެވެ.

ޝާހިދު މިފަދައިން ވިދާޅުވީ،  ކުރިޔަށް އޮތް 20 ވަނަ މަޖިލިސް އިންތިހާބުގެ ކެމްޕޭނުގައި ރޭ ހއ. ދިއްދޫގައި އެމްޑީޕީން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

މިގޮތުން ޝާހިދު ވިދާޅުވީ، ދުނިޔޭގެ އެކި ކަންކޮޅުތަކުގައި ހަނގުރާމަ އާއި ޤަތުލުއާންމުތަށް ހިންގާ ޤައުމުތައް ފަދައިން ރާއްޖޭގައިވެސް ފިތުނަ އުފައްދާ ގޮތަށް މި ސަރުކާރުގެ އަމަލުތައް ބައްޓަމުން ކުރަމުންދާ ކަމަށެވެ. އަދި ދިވެހިންނަކީ އެއް ނަސްލެއްގެ އެއް ދީނެއްގެ އެއް ބައެއް ކަމާއި ބައިބައިވުން ނުބާއްވަން ދަރިންނަށް ވިސްނައިދޭއިރު، މި ސަރުކާރުން ތިމާމެންނާ އެކީ ތިބި މީހުން ނޫން އެހެން އެންމެންނަކީ ދިވެހިން ނޫން ކަމަށް ބުނެ ރޮނގެއް ދަމާލަމުންދާ ކަމަށް ވެސް ޝާހިދު ވިދާޅުވިއެވެ.

Advertisement

އެގޮތުން ގައުމިއްޔަތުގެ ނަމުގައި އެ އޮށް އިންދަމުންދާ ކަމަށާއި، ސަރުކާރުގައި ތިބި މީހުން އެފަދައިން ފިތުނަ އުފެދޭ ވާހަކަތައް ދައްކަމުން ދާއިރު ހަނު ނީންނެވުމަށް ޝާހިދު ވަނީ ރައީސް ޑރ.މުއިއްޒު އަށް ގޮވާލައްވާފައެވެ.

މީގެ އިތުރުންވެސް ޝާހިދު ވަނީ، ރައީސް މުއިއްޒާއި ސަރުކާރުގައި ތިއްބެވި ބޭފުޅުންނަކީ މިއަދު މަގުމަތީގައި އުޅޭ އެކްޓިވިސްޓުން ނޫން ކަމަށާއި އެއީ ރައްޔިތުން ގޮވައިގެން ކުރިއަށްދާންޖެހޭ ވެރިންނަށް ވާއިރު އެމަންޒަރު ނުފެންނަ ކަމަށް ވިދާޅުވެ، ގައުމު އެކުވެރިކޮށް އެކަތިގަނޑެއްގެ ގޮތުގައި ހިފެހެއްޓުމުގެ ޒިންމާ ރައީސް ޑރ.މުއިއްޒު އާއި ރައްޔިތުން ހަވާލުކޮށްފައިވާއިރު، ރައްޔިތުންގެ މެދުގައި ނަފްރަތު އުފެއްދުމަށް ކުރާ މަސައްކަތް ހުއްޓާލެއްވުމަށް ވެސް ގޮވާލައްވާފައެވެ.