ޖުލައިމަހުގެ ތެރޭގައި އޮންލައިންކޮށް ހިންގި ސްކޭމްތައް ވަރަށްބޮޑަށް އިތުރުވިކަމަށް މޯލްޑިވްސް ޕޮލިސް ސާވިސްއިން ބުނެފިއެވެ.
ފުލުހުން އާއްމުކުރި ޖުލައިމަހުގެ ތަފާސްހިސާބަށް ބަލާއިރު ހުސްވި ޖުލައިމަހު އެންމެ ގިނައީ އޮންލައިން ވިޔަފާރީގެ ސްކޭމްތަކެވެ. އޮންލައިން ވިޔަފާރި ނުވަތަ އީ ކޮމާސްއާ ގުޅުންހުރި ސްކޭމްތަކުން ޖުލައިމަހު އެކަނިވެސް 78 މައްސަލަ ހުށަހެޅިފައިވާއިރު، މިއީ މި މުއްދަތުގެ ތެރޭގައި ހުށަހެޅުނު މައްސަލަތަކުގެ 43 އިންސައްތަކަމަށް ފުލުހުން ބުންޏެވެ.
ޖުލައިމަހު ސްކޭމްތަކުން 1.37 މިލިއަން ރުފިޔާ ގެއްލުނުކަމަށް ފުލުހުން ވަނީ ފާހަގަކޮށްފައެވެ. މީގެ ތެރެއިން 635271.17 ރުފިޔާ ހޯދުނުއިރު، 733،537.39 ރުފިޔާ ހޯދިފައިނުވާކަމަށް ފުލުހުން ބުންޏެވެ.
ސްކޭމްތަކުގެ މައްސަލަތަކަށް ބަލާއިރު ހުސްވި ޖުލައިމަހު ޖުމްލަ 180 މައްސަލަ ފުލުހުންނަށް ހުށަހެޅުނެވެ. މީގެ ތެރޭގައި އޮންލައިން ކޮށް ހިންގި ސްކޭމްތަކުގެ އިތުރުން ދެން އެންމެ ގިނައީ ބުކިން ކެންޝަލޭޝަން ނަމުގައި ހޯދި ފައިސާއެވެ.
އެންޓި ސްކޭމް ސެންޓަރެއް ގާއިމްކޮށް ފުލުހުން މި ބާވަތުގެ މައްސަލަތައް މިހާރު ކުރިއަށްގެންދަނީ އެ ސެންޓަރު މެދުވެރިކޮށެވެ. އެންޓި ސްކޭމް ސެންޓަރު ގާއިމްކޮށް މަސައްކަތް ފެށި ފުރަތަމަ އަހަރުވެސް ވަނީ 10 މިލިއަނަށްވުރެ ގިނަ ރުފިޔާ އަނބުރާ ހޯދާފައެވެ.
Advertisement
This content is created and paid for by advertisers and does not involve Voice Journalists
