ހިމަބިހި ނައްތާލުމާ ދާދި ގާތަށް ދިޔަ ބަންގްލާދޭޝްގައި ހިމަބިހި ކޮންޓްރޯލެއް ނެތި ފެތުރެމުން އެބަދެއެވެ.

މި އަހަރުގެ މާޗު މަހުން ފެށިގެން ހޮސްޕިޓަލްތައް ފުރި، ތަކެތި ދަތިވެ، ބަލި ކުދިން އިތުރުވަމުންދާއިރު، ހިމަބިހީގެ ސަބަބުން މަރުވި ޝައްކުކުރެވޭ އަދި ކަށަވަރުވެފައިވާ އެއް ހާސް މަރު ވަނީ ރިޕޯޓުކޮށްފައެވެ.

އޭޕްރީލް މަހު މުޅި ގައުމުގައި ވެކްސިން ދިނުމުގެ ކެމްޕޭނެއް ފެށި ނަމަވެސް، މި ރޯގާ ދިގުދެމިގެންގޮސްފައިވަނީ 2024 އަދި 2025 ވަނަ އަހަރު ގަވާއިދުން ދެވޭ ވެކްސިން ދިނުމަށް ބުރޫއެރުމުގެ ސަބަބުން ކަމަށް މާހިރުން ބުނެއެވެ. އެއީ އޭރުގެ ބޮޑުވަޒީރު ޝޭޚް ހަސީނާއާ ދެކޮޅަށް ހިންގި މުޒާހަރާތަކަށްފަހު އެގައުމުގައި ސިޔާސީ ނުހަމަޖެހުންތައް ހިންގަމުންދިޔަ ދުވަސްވަރެވެ.

އެމެރިކާގެ ސީ.ޑީ.ސީއިން ބުނާ ގޮތުގައި ދުނިޔޭގައި މިވަގުތު އެންމެ ހަލުވިކޮށް ހިމަބިހި ފެތުރެމުންދަނީ ބަންގްލަދޭޝްގައެވެ.

ދުނިޔޭގެ ސިއްހަތު ޖަމްއިއްޔާ (ޑަބްލިއު.އެޗް.އޯ) އާއި، ޔުނިސެފް އަދި ސިއްހީ އެހެން އިދާރާތަކުންވެސް ވަނީ ގަވާއިދުން ވެކްސިން ދިނުމުގެ ތާވަލުތަކަށް ބުރޫއެރުމުން ކުރި އަސަރު ފާހަގަކޮށްފައެވެ. މި ބަލި ފެތުރެން ފެށިތާ ކުރީކޮޅު، ބަލިޖެހުނު މީހުންގެ ގާތްގަނޑަކަށް 80 އިންސައްތައަކީ ފަސް އަހަރުން ދަށުގެ ކުދިންނެވެ.

ހިމަބިހި ބަންގްލަދޭޝްގައި ހިމަބިހި ފެތުރެން ފެށީ މިބަލި ނައްތާލުމަށް ގިނަ އަހަރުތަކެއް ވަންދެން ހޯދި ކުރިއެރުންތަކަށްފަހުއެވެ. ކޯވިޑް-19 ގެ އާލަމީ ވަބާގެ ދުވަސްވަރު ވެކްސިން ދިން މިންވަރު މަދުވި ދުވަސްކޮޅު ފިޔަވައި، ފާއިތުވި ދިހަވަރަކަށް އަހަރުގެ ގިނަ ދުވަސްތަކުގައި ބަންގްލާދޭޝްއިން ވަނީ ހިމަބިހި ވެކްސިން ދިނުމުގެ ނިސްބަތް، ޑަބްލިއު.އެޗް.އޯ އިން އިރުޝާދުދޭ 95 އިންސައްތައިގައި ނުވަތަ އެއަށްވުރެ މަތީގައި ހިފަހައްޓާފައެވެ.