ދިވެހީންގެ ސަރަހައްދު ދިވެހިން އަމިއްލައަށް ބެލެހެއްޓުމަކީ އެކަމާއި އެހެން ބަޔަކު ކަންބޮޑުވާނެ ޖެހޭ ކަމެއް ނޫން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރޭގައި އެމްއެންޑީއެފްގެ އެއަރ ކޯރ އަދި އަންމޭންޑް އޭރިއަލް ޑުރޯން އިފްތިތާހު ކުރުމަށް ނ. މާފަރުގައި ބޭއްވި ޖަލްސާގައި ވާހަކަ ދައްކަވަމުން ރައީސް ޑރ.މުއިއްޒު ވިދާޅުވީ، އަމިއްލަ ސިޔާދަތީ ބާރު މި ސަރަހައްދަށް ހިނގަން ޖެހޭނެ ކަމަށާއި ދިވެހީންގެ ސަރައްހަދު ދިވެހީން ބަލަހައްޓާތީ، އެކަމާއި މެދު ބަޔަކު ކަންބޮޑުވާނަމަ އެއީ އަދި މާ ބޮޑަށް ކަންބޮޑުވާން ޖެހޭ ކަމެއް ކަމަށެވެ.
"އަޅުގަނޑުމެންނަކީ މިނިވަން މުސްތަގިއްލު ގައުމެއް. އަމިއްލަ ސިޔާދަތީ ބާރު އަޅުގަނޑުމެންގެ ސަރަހައްދަށް ހިނގަން ޖެހޭނެ ގައުމެއް. އެހެންވީމަ އަޅުގަނޑުމެން އަމިއްލައަށް އަޅުގަނޑުމެންގެ ސަރަހައްދު ބެލެހެއްޓުމަކީ އެހެން ބަޔަކު އެކަމާ ކަންބޮޑުވާން ޖެހޭ ކަމެއް ނޫން. ކަންބޮޑުވާނަމަ އެއީ އަދި އަޅުގަނޑުމެން މާ ކަންބޮޑުވާން ޖެހޭ ކަމެއް."
ރައީސް ޑރ.މުއިއްޒު ވިދާޅުވިއެވެ.
ރައީސް ޑރ.މުއިއްޒު ވިދާޅުވީ، ދިވެހިރާއްޖެ އަކީ ވަރަށް ކުޑަ ގައުމެއް ކަމަށް އަމިއްލަ އަށް ގަބޫލްކުރަމުން އައި އައުމަކީ ރަނގަޅުގޮތެއް ނޫންކަމަށާއި، ނުވަ ލައްކަ އަކަ ކިލޯމިޓަރަށްވުރެ ބޮޑު ކަނޑުގެ އެކްސްކްލޫސިވް އިކޮނޮމިކް ޒޯނެއް ހިމެނޭ މި ގައުމަކީ ވަރަށް ބޮޑު ގައުމެއް ކަމަށެވެ. އަދި އަމިއްލަ ބާރުވެރިކަމެއް ނެތިގެން މީގެ ކުރިން މި ސަރަހައްދު ނުބެލެހެއްޓި އޮތް އޮތުމަކީ ކޮންމެހެން ކަންބޮޑުވާން ޖެހޭ ކަމެއް ނޫން ކަމަށާއި، މިއަދު ބުރަ މަސައްކަތުން މި ބޮޑު ގައުމުގެ މި ބޮޑު ސަރަހައްދު ބެލެހެއްޓުމުގެ ގާބިލްކަން ނިއުމަތްކުރައްވާފައިވާ ކަމަށް އެމަނިކުފާނު ވިދާޅުވިއެވެ.
މީގެ އިތުރުންވެސް ރައީސް ޑރ.މުއިއްޒު ވިދާޅުވީ، ގައުމުގެ މިނިވަންކަމާއި އަމިއްލަ ވަންތަކަން ދިފާއުކޮށް ހިމާޔަތްކުރުމަކީ ދިވެހިންނަށް ލިބިފައިވާ ހައްގެއް ކަން އެއީ ކޮންމެ ދިވެއްސަކު ވެސް ގަބޫލްކުރަން ޖެހޭ ކަމެއް ކަމަށެވެ. އަދި މި ގައުމުގެ ކޮންމެ މީހަކީވެސް އެންމެ ފުރަތަމަ ދިވެއްސެއް ކަމަށާއި، ފިކުރުގައި ކޮންމެ ކަހަލަ ތަފާތުކަމެއް ހުރި ނަމަވެސް އިސްކުރަންވީ ދިވެހި ވަންތަކަން ކަމަށްވެސް ރައީސް ޑރ.މުއިއްޒު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
