"ބިންވެރިޔާ" އަދި "ގެދޮރުވެރިޔާ" ސްކީމްއާއި ގުޅިގެން ހުށަހަޅާ މައްސަލަތަކާއި އަދި ނިންމަންޖެހޭ ނިންމުންތައް ނިންމުމަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ލަފާފުޅުގެ މަތިން އުފެއްދި "ހައުސިން ކޮމިޓީ"ގެ މުހިންމު ނިންމުންތައް ނިންމުމުގައި މާލެ ސިޓީ ކައުންސިލްގެ ބައިވެރިވުން ހިމެނުމަށް އިތުރު ކޮމެޓީއެއް ހައުސިން މިނިސްޓަރު މިނިސްޓަރު ޑރ. އަލީ ހައިދަރު އުފައްދަވައިފިއެވެ.

މި ކޮމިޓީ އަކީ، މުހިންމު ނިންމުންތައް ނިންމުމުގައި މާލެ ސިޓީ ކައުންސިލްގެ ބައިވެރިވުން ހިމެނުމަށް ބޭނުންވާތީ މިިނިސްޓްރީ އޮފް ސިޓީސް ލޯކަލް ގަވާމަންޓް އެންޑް ޕަބްލިކް ވާކްސްގެ މަޝްވަރާގެ މަތީން މާލެ ސިޓީގެ ފަސް ކައުންސިލަރުން ހިމެނޭ ކޮމެޓީއެއް ކަމަށް ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާ އިން ވަނީ ބުނެފައެވެ.

މި ކޮމިޓީގައި ހިމެނޭ 5 މެމްބަރުންނަކީ: 

1) މަރިޔަމް ނާޒިމާ މުހައްމަދު ފާއިޒް

2) އާއިޝަތު ނިޒްލީ ރަޝީދު

3) އަހްމަދު އައިފާން

4) ހަސަން ނިޒާމް

5) މުހައްމަދު އަރީޝް

މި ކޮމެޓީގެ ފުރަތަމަ ބައްދަލްވުން މި މަހުގެ 17 ވަނަ ދުވަހު ބޭއްވުމަށް ހަމަޖެހިފައިވާއިރު،  ކޮމެޓީގެ ސެކްޓްރިއޭޓް ބަލަަހައްޓާނީ އެ ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާ އިންނެވެ.

"ބިންވެރިޔާ" އަދި "ގެދޮރުވެރިޔާ" ސްކީމްއާއި ގުޅިގެން ހުށަހާޅާ މައްސަލަތަކާއި އަދި ނިންމަންޖެހޭ ނިންމުންތައް ނިންމުމަށް، އުފެއްދި "ހައުސިން ކޮމިޓީ" ގައި ވެސް އުފެއްދީ ފަސް މެންބަރުން ހިމެނެއެވެ. އެއީ:

1) އަނީސާ އަހްމަދު

2) އާމިނަތު އީނާސް

3) އަހްމަދު އަލީ މަނިކު

4) އަބްދުލްއަޒީޒް ޔޫސުފް

5) މަރިޔަމް ފިޒާނާ ރަޝީދު

އެ ކޮމެޓީގެ ފުރަތަމަ ބައްދަލުވުން އިއްޔެ ބާއްވާފައިވާއިރު  ކޮމެޓީގެ ޗެއާ އަކީ އަނީސާ އަހްމަދެވެ. ވައިސް ޗެއާ އަކީ އަބްދުލްއަޒީޒް ޔޫސުފް އެވެ. 

މިފަދަ ކޮމިޓީ އެއް ސަރުކާރުން އުފެއްދުމުގެ ބޭނުމަކީ ކުރީ ސަރުކާރުން އިމާރާތް ކުރަން ފެށި 4000 ފްލެޓް ލިބޭނެ ކަމަށް ކަނޑައަޅާފައިވާ މީހުންގެ ލިސްޓާ ގުޅޭ ގޮތުން އެންޓި ކޮރަޕްޝަން ކޮމިޝަން (އޭސީސީ) އިން ހިންގި ތަހުގީގުގައި، ޝަރުތު ހަމަނުވާ ކަމަށް ކަނޑައެޅުމުންނެވެ.

މިދިޔަ ސަރުކާރުން ފްލެޓަށް ކުރިމަތިލުމަށް ހުޅުވާލުމުން، ދޮރުވެރިޔާ ސްކީމްގެ ފުރަތަމަ ބުރުގައި 21،000 މީހުން ފްލެޓަށް ކުރިމަތިލި އިރު އޭގެ ތެރެއިން 12،000 މީހުންނަށް ފްލެޓް ލިބޭ ކަމަށް ކަނޑައަޅައި، ފުރަތަމަ ފްލެޓް ދޭން ނިންމީ 4000 މީހުންނަށެވެ. ކުރީ ސަރުކާރުގެ ވެރިކަމުގެ ފަހު ދުވަސްތަކުގައި ހިނގި މި މަރުހަލާގައި، ވެރިކަން ނިމުނުއިރު ފްލެޓް ލިބުނު ކަމުގެ ލިޔުން ވެސް އޮތީ އެމީހުންނަށް ދީފަ އެވެ. 

ނަމަވެސް، މިކަމުގައި ކޮރަޕްޝަން ހިންގާފައިވާ ކަމަށް ބުނެ ބަޔަކު އޭސީސީއަށް ޝަކުވާ ހުށަހެޅުމުން، ފްލެޓް ދިނުން ހުއްޓުވައި، ޕޯޓަލްގެ އެކްސެސް ވެސް ވަނީ އޭސީސީގެ ކޮންޓްރޯލްގެ ދަށަށް ގެނެސްފައެވެ. މި މައްސަލަ އާއި ގުޅިގެން އޭސީސީން ބުނީ  ޝަރުތު ހަމަވާ ކަމަށް ކަނޑައެޅި 59.6 ޕަސެންޓް މީހުން ޝަރުތު ހަމަނުވާ ކަމަށެވެ.