ރައީސް ޑރ. މުހައްމަދު މުއިއްޒުގެ ސަރުކާރު ވައްޓާލަން ޖެހިއްޖެ ނަމަ ވައްޓާލާނެ ކަމުގެ އިންޒާރު އެމްޑީޕީގެ ޗެއާޕާސަން ފައްޔާޒު އިސްމާއިލް، ރޭ ދެއްވައިފިއެވެ.

އެމްޑީޕީ ކެމްޕޭން ޖަލްސާއެއްގައި ވަހްކްދައްކަވަމުން ފައްޔާޒު ވިދާޅުވީ ރާއްޖެ ހަމަމަގުގައި ހިފަހައްޓަން ކުރަން ޖެހޭ ކަންކަން ކުރުމަކީ ސިޔާސީ ޕާޓީތަކަށް އޮތް ގާނޫނީ ޒިންމާއެއްކަމަށާއި، ދޮގާއި މަކަރާއި އޮޅުވާލުމުން ބަޔަކު ވެރިކަމަށް އަރާ ތިބިނަމަވެސް، ފުދުންތެރިކަން ނެތް އަނިޔާވެރި ގައުމަކަށް ރާއްޖެ ވާން ދޫކޮއްލެވެން ނެތްކަމަށެވެ. 

އެމްޑީޕީން އެ ދައްކަނީ ސަރުކާރު ވައްޓާލަން އުޅެ، ސަރުކާރަށް ޖެއްސުން ކުރަން އުޅޭ ވާހަކައެއް ވެސް ނޫން ކަމަށާއި، ނަމަވެސް ރައީސް ޑރ. މުހައްމަދު މުއިއްޒުގެ ސަރުކާރު ވައްޓާލަން ޖެހިއްޖެ ނަމަ ވައްޓާލާނެކަމަށް ވެސް މި ޖަލްސާގައި ފައްޔާޒު ވަނީ ވިދާޅުވެފައެވެ.

މި ސަރުކާރުން ވޭތުވެދިޔަ ހަތަރު މަހުން ފެނުނު ކުލަވަރު ކަންކަން ހައްދުންނައްޓާއިގެން އެމްޑީޕީއަށް އެނގޭ ކަމަށާއި މިހާރު ވެސް މި ސަރުކާރުގެ ހާލަތު އޮތީ ވަރަށް ގޯސްކޮށް ކަމާއި، ރާއްޖޭގެ ހާލަތު ދައްވަމުން ދާކަމަށް ފައްޔާޒު ބުންޏެވެ.