ބާ ކައުންސިލުގެ ރައީސްކަމުގެ މަގާމަށް ހުސައިން ސިރާޖު އިންތިހާބުކޮށްފިއެވެ.

ބާ ކައުންސިލްގެ އެގްޒެކެޓިވް ކޮމިޓީގެ ހުސްވެފައިވާ މަގާމުތަކަށް މެމްބަރުން ހޮވުމުގެ އިންތިހާބުގައި، މިމަގާމަށް ސިރާޖު އާއި އެކު މުހައްމަދު ފައިސަލް ވެސް ވަނީ ކުރިމަތިލައްވާފައެވެ. އެގޮތުން ސިރާޖަށް 224 ވޯޓު ލިބިވަޑައިގެންފައިވާއިރު،  ފައިސަލަށް ލިބިވަޑައިގަތީ 172 ވޯޓެވެ.

ބާ ކައުންސިލްގެ ރައީސް ކަމަށް ބޭފުޅަކު އައްޔަނުކޮށްފައިމިވަނީ ބާ ކައުންސިލްގެ ރައީސް ކަމުގެ މަގާމު ހުސްވީ އެ ކައުންސިލްގެ ރައީސްގެ މަގާމުގައި ހުންނެވި ކުރީގެ އެސިސްޓެންޓް އެޓާނީ ޖެނެރަލް އިސްމާއީލް ވިޝާމް މިދިޔަ ޖެނުއަރީ މަހު ކުއްލިގޮތަކަށް އަވަހާރަވުމާއި ގުޅިގެންނެވެ.

މީގެ ކުރިން 2019 ވަނަ އަހަރު މޯލްޑިވްސް އިންޓަނޭޝަނަލް އާޓިބިޓްރޭޝަން ސެންޓަރ (އެމްއައިއޭސީ) ގެ ވައިސް ޗެއާމަން ގެ މަގާމަށް ވެސް އައްޔަނުކުރި ސިރާޖަކީ މަދަނީ ބޮޑެތި މައްސަލަތަކުގައި ކޯޓުތަކުގައި ވަކާލާތު ކުރައްވާ މަޝްހޫރު ގާނޫނީ ވަކީލެއްކަން ފާހަގަކޮށްލެވެއެވެ.

މީގެ އިތުރުން މި އިންތިހާބުގައި ބާ ކައުންސިލުގެ އެގްޒެކްޓިވް ކޮމިޓީގެ މެންބަރު ކަމަށްވެސް ބޭފުޅަކު އިންތިހާބުކޮށްފައި އެވެ.މެމްބަރުކަމަށް ކުރިމަތި ލެއްވި ޝިފާއު އެކަނި ކަމުން އެމަގާމަށް ޝިފާއު އިންތިހާބު ކޮށްފައިވަނީ ފެންނަ ނުފެންނަ ވޯޓަކަށް ފަހުއެވެ. އެގޮތުން 248 މެމްބަރަކު ފެންނަކަމަށް ވޯޓް ދިން އިރު، 88 މެމްބަރަކު ވަނީ ނުފެންނަ ކަމަށް ވޯޓް ދީފައެވެ.