މި ރަމަޟާން މަހުގެ ފަހު 10 ގައި އޮފީހަށް ހާޒިރުވެ ޝަރުއީ މުއައްޒަފުން ކުރާ މަސައްކަތްތަކަށް ރަސްމީ ބަންދު ދުސްތަކުގައި ކުރާ މަސައްކަތްތަކަށް ދޭ ނިސްބަތުން އިތުރު ގަޑީގެ ފައިސާ ދެވޭނެ ކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނެފިއެވެ.

ރަމަޟާން މަހުގެ ފަހު 10 ގައި ޑީޖޭއޭ އިން ފޯރުކޮށްދިނުމަށް ހަމަޖެހިފައިވާ ހިދުމަތްތަކާއި ގުޅޭ ގޮތުން އެ އިދާރާއިން ނެރުނު ނޫސް ބަޔާނުގައި ބުނީ، އިސްލާމީ އުސޫލުތައް ގާއިމްކުރުމާއި ދީނީ ކަންކަމަށް ރައްޔިތުން ލޯބިޖެއްސުމާއި، ދީނީ ކަންކަމަށް އިސްކަން ދިނުމަށް ފުރުސަތު ދިނުމުގެ ގޮތުން ރަމަޟާން މަހުގެ ފަހު ދިހައެއް ބަންދުކުރުމަށް ސަރުކާރުން ނިންމަވާފައިވުމާއެކު، ޝަރުޢީ ދާއިރާގެ މުވައްޒަފުންނަށް އެ ފުރުސަތު ދިނުމުގެ ގޮތުން، އެ ދުވަސްތަކުގައި މުވައްޒަފުން އާންމު އުސޫލުން އޮފީހަށް ހާޒިރުވާން ނުޖެހޭނެ ކަމަށެވެ.

އެހެންކަމުން ރޯދަ މަހުގެ ފަހު 10 ގައި ވީހާވެސް މަދު ދުވަސްތަކެއްގައި ވީހާވެސް މަދު އަދަދެއްގެ މުވައްޒަފުން ނެރެގެން ޚިދުމަތްތައް ދިނުމަށް އިސްކަން ދެވޭނެ ކަމަށާއި، ޝަރުޢީ ދާއިރާގެ މުވައްޒަފުން މި ދުވަސްތަކުގައި އޮފީހަށް ހާޒިރުވެ ކުރާ މަސައްކަތަށް، ރަސްމީ ބަންދު ދުވަސްތަކުގައި ކުރާ މަސައްކަތަށް ދޭ ނިސްބަތުން އިތުރު ގަޑީގެ ފައިސާ ދިނުމަށް ހަމަޖެހިފައިވާ ކަމަށް ޑީޖޭއޭ ގެ ބަޔާނުގައި ވެއެވެ.

ފަހު 10 ގައި ޑީޖޭއޭ އިން މައިގަނޑު ގޮތެއްގައި ދެ ޚިދުމަތެއް ފޯރުކޮށްދިނުމަށް ވަނީ ނިންމާފައެވެ. އެއީ ކުށާއި ދަރަނީގެ ރިކޯޑް ސާފުކޮށްދިނުމުގެ ޚިދުމަތާއި، ކޯޓުތަކުގެ ހުކުމްތަކާ ގުޅިގެން ކޯޓުތަކަށް ދައްކާ ފައިސާ އޭގެ ހައްގުވެރިންނަށް ރައްދުކުރުމުގެ ޚިދުމަތެވެ. 

ޑީޖޭއޭ އިން ބުނީ މިފަދައިން ނިންމާފައިވަނީ، ބަންދު ދުވަސްތަކުގައިވެސް ކުށާއި ދަރަނީގެ ރެކޯޑް ސާފުކުރުމަށް ގިނަ އަދަދެއްގެ ރައްޔިތުން އެދޭތީ އާއި، ކުރިއަށް އޮތީ ޢީދު ބަންދަށްވެފައި، ރަމަޟާން މަހުގެ ފަހު ދިހައެއްގައި ދަރިންގެ ޚަރަދުގެ ގޮތުގައި ދައްކާ ފައިސާ އޭގެ ހައްގުވެރިންނަށް ލިބޭނެ ގޮތް ހަމަޖައްސައި ދިނުމަށް ކަމަށެވެ.