ރާއްޖޭގައި ހަތަރު އަހަރު ދުވަހުގެ މުއްދަތަށް އަދުލުއިންސާފުގެ ނިޒާމު ހަރުދަނާކުުރުމަށް "އެކައުންޓަބިލިޓީ އެންޑް އިންޓެގްރިޓީ މެޓާސް އެއިމް ޕްރޮޖެކްޓް" ފެށުމަށް އީޔޫ އާއި ޔޫއެންޑީޕީ އާ ދެމެދު ޕާޓްނާޝިޕް އެއްބަސްވުމެއްގައި ސޮއިކޮށްފިއެވެ.

މިކަމާއި ގުޅިގެން އީޔޫއިން ބުނެފައިވާގޮތުން، ގާތްގަޑަކަށް 5،000،000 ޕައުންޑްގެ މި ޕްރޮޖެކްޓަކީ އީޔޫ އިން ރާއްޖެއަށް ކަނޑައަޅާފައިވާ މަލްޓި އިޔާ އިންޑިކޭޓިވް ޕްރޮގްރާމާއި ޔޫއެންޑީޕީ ކަންޓްރީ ޕްރޮގްރާމްއާ އެއްގޮތްވާ ގޮތުގެ މަތިން އީޔޫގެ ޚަރަދުގައި ކުރިއަށްގެންދިއުމަށް ރާވާފައިވާ ޕްރޮޖެކްޓެކެވެ.

އީޔޫއިން ބުނިގޮތުގައި މި ޕްރޮޖެކްޓުގެ ކުރިއަށް ގެންދަނީ މައުގަނޑު ދެ އަމާޒަކަށް ވާސިލް ވުމަށެވެ. އެއީ؛

1) އަދުލުއިންސާފުގެ ނިޒާމު ހަރުދަނާކޮށް، ޝާމިލް ނިޒާމަކަށް ހެދުމަށް ކުރެވޭ މަސައްކަތްތަކުގައި ހަރުދަނާ ގާނޫނީ އޮނިގަނޑެއް އެކުލަވާލުން.

2) ނިޒާމީ ގޮތެއްގައި ނަޒާހަތްތެރިކަން އިތުރުކުރުމަށް ކުރެވޭ މަސައްކަތްތަކުގައި ހަރުދަނާ ގާނޫނީ އޮނިގަނޑެއް އެކުލަވާލުމާއި ތަންފީޒީ އިދާރާތައް ބާރުވެރިކުރުވުމާއި ރައްޔިތުންގެ މެދުގައި މި ނިޒާމަށް އޮތް އިތުބާރު ބޮޑުކުރުން

މި އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ބަންޑާރަ ނައިބު އަޙްމަދު އުޝާމް ވަނީ ޑިމޮކްރެޓިކް އުސޫލުތައް ނެގެހެއްޓުމާއި އިންސާނީ ޙައްޤުތައް ކަށަވަރުކުރުމުގައި އެންމެން ޝާމިލުވާ އަދުލުއިންސާފުގެ ނިޒާމެއް ގާއިމުކުރުމަށް ސަރުކާރުން މަސައްކަތްކުރަމުން ގެންދާނެކަމުގެ ޔަގީންކަންދެއްވާފައެވެ.

އަދި ޔޫއެންޑީޕީއާއި އީޔޫގެ އެހީއަކީ މި ނިޒާމު ފުރިހަމަކުރުމަށް ލިބޭ އިތުރު ބާރަކަށް ވެގެންދާނެ ކަމެއް ކަމުގައި އުޝާމް ވިދާޅުވިއެވެ.

މި އެގްރިމެންޓްގެ ދަށުން ތަންފީޒުކުރެވޭ ޕްރޮޖެކްޓްގެ ތަންފީޒީ އިދާރާތަކުގެ ގޮތުގައި ބަންޑާރަ ނައިބުގެ އޮފީހާއި، ޖުޑީޝަލް ސާވިސް ކޮމިޝަނާއި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓާއި ފެމިލީ ޕްރޮޓެކްޝަން އޮތޯރިޓީއާއި އެންޓިކޮރަޕްޝަން ކޮމިޝަންގެ އިތުރުން އިންފޮމޭޝަން ކޮމިޝަނަރުގެ އޮފީސް ހިމެނެއެވެ.