މަސްތުވާތަކެތި ބޭނުންކުރާ ފަރާތްތަކަށް ނޭޝަނަލް ޑްރަގް އެޖެންސީ (އެންޑީއޭ) އިން ދޭ ފަރުވާ އެއް ކަމަށްވާ މެތަޑޯން ޓްރީޓްމެންޓް، ރިހެބަށް ނުގޮސް ކުރިއަށް ގެންދެވޭނެ ގޮތް ހައްދަވައިދެއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް މުއިއްޒު މިފަދައިން ވިދާޅުވީ، ރައީސް އޮފީހުން ސިލްސިލާކޮށް ގެނެސްދޭ ރައީސް ގެ ޖަވާބު ޕްރޮގްރާމްގައި، މަސްތުވުމުން ސަލާމަތްވުމަށް ފަރުވާ ހޯދަމުންދާ މީހުން، އެ ފަރުވާ ފުރިހަމަކުރަން ފުރުޞަތު ދިނުމާ ބެހޭގޮތުން މާލެ ސިޓީ، މއ.ސްނޯލައިޓް، އާމިނަތު ނަތާޝާ ކުރެއްވި ސުވާލަކަށް ޖަވާބު ދެއްވަމުންނެވެ.

މިގޮތުން ނަތާޝާ ވަނީ، އެންޑީއޭގެ ފަރުވާގައި ހުންނަ އިރުވެސް، ކުރީގެ މައްސަލައެއްގައި ޑްރަގް ކޯޓުން ހުކުމް ކޮށްފިނަމަ، ފަރުވާގައި ހުންނަ ކުއްޖަކުވެސް، ވަޒީފާގައި ހުރުމަށްފަހު ރިހެބަށް ދާންޖެހޭ ކަން ފާހަގަކޮށް އެ މައްސަލަ ހައްލުކޮށްދިނުމަށް ރައީސް މުއިއްޒު އަށް ދަންނަވާފައެވެ.

Advertisement

ނަތާޝާގެ ސުވާލުގެ ޖަވާބުގައި ރައީސް ޑރ.މުއިއްޒު ވިދާޅުވީ، އެ ގޮތަށް އިންތިޒާމް ކުރެވޭނެ ކަމަށާއި، އެކަމާއި ގުޅޭ ގޮތުން ކަމާ ބެހޭ ފަރާތްތަކާއި މަޝްވަރާ ކުރައްވާނެ ކަމަށެވެ.

މީގެ އިތުރުންވެސް ރައީސް ޑރ.މުއިއްޒު ވިދާޅުވީ މިކަމާއި ގުޅިގެން ހަމަޖައްސަން ޖެހޭ ކަންތައްތައް ގާނޫނީ އިމުގެ ތެރެއިން ހަމަޖެއްސުމަށް މަސައްކަތް ކުރައްވާނެ ކަމަށެވެ.