އެމްޑިޕީން މަޖިލިސް އިންތިހާބުގެ މެޖޯރިޓީ ދެމެހެއްޓުމަށް އެދެމުން އަންނައިރު މިވީހާދުވަހު ކުރެއްވީ ކޮން ކަމެއްތޯ ރައީސް ޑރ. މުޙައްމަދު މުއިއްޒު ސުވާލު އުފައްދަވައިފިއެވެ.
ރައްޔިތުންގެ މަޖިލީސް އިންތިހާބުގައި ވިލުފުށީ ދާއިރާއަށް ވާދަކުރައްވާ ސަރުކާރު ކެންޑިޑޭޓް ހަސަން ވަހީދުގެ ކެމްޕެއިން ޖަގަހަ ހުޅުވުމުގެ ޖަލްސާގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، އެމްޑީޕީން ބުނަމުން އަންނަނީ އޭރު ދޭން ބުނި ފްލެޓުތަކާއި ގޯތިތައް އެޕާޓީން ރައްޔިތުންނަށް ދޭނެ ކަމަށާއި އެމްޑީޕީއަށް މަޖިލިސް އިންތިހާބުގެ މެޖޯރިޓީ ދިނުމަށެވެ. ނަމަވެސް މިހާރުވެސް އޮތީ އެމްޑީޕީގެ މެޖޯރިޓީ ކަމަށްވެފައި އެޕާޓީން ވަކި ކުރެއްވީ ކޮން ކަމެއްތޯ ރައީސް މުއިއްޒު ވަނީ ސުވާލު އުފައްދަވާފައެވެ.
އަޅުގަނޑުމެންނަށް އެބަ އިވޭ، އަޅުގަނޑުމެންގެ އިދިކޮޅު ފަރާތްތަކުން ވަރަށް ބާރަށް ދައްކާ ވާހަކައެއް، ތިމަންނަމެންނަށް މެޖޯރިޓީ ރައްޔިތުން ދެއްވާށޭ، ތިމަންނަމެން އޭރުގައި ދޭން ބުނި ފެލްޓުތަކާއި ގޯތިތައް ދޭނަމޭ. އަޅުގަނޑު ހިތަށްއަރާ، އެބޭފުޅުން އަތުގަ ނޫންބާވައޭ މިހާރުވެސް މެޖޯރިިޓީ އޮތީ. އެ މެޖޯރިޓީ އަޅުގަނޑުމެން ވެރިކަން ފެށިގެން އައި ދުވަހުވެސް އޮތީ އެމްޑީޕީ އަތުގަ. ސުޕަ މެޖޯރިޓީ. ހަތަރު މަސް ވެގެން ދިޔައީ. ހަމަ އެއްކަމެއްވެސް ނުކުރައްވައެއް ނޫންތޯ؟
ރައީސް ޑރ. މުޙައްމަދު މުއިއްޒު ވިދާޅުވިއެވެ.
މީގެ އިތުރުން، އެމްޑީޕީގައި ތިބީ އިޚުލާސްތެރި ބައެއްނަމަ، މިހާރު ނުވެ އޮތް ކަންތައް ކުރެވެން އަންނަނީ މަޖިލިސް އިންތިހާބުގެ އާ އަޤުލަބިއްޔަތެއް ހޯދައިގެންތޯ ވެސް ރައީސް މުއިއްޒު ވަނީ ސުވާލު އުފައްދަވާފައެވެ. އަދި މީގެ އިތުރުން ފްލެޓުތަކާއި ގޯތިތައް މި ވެރިކަމުގައި ހަވާލުކުރަން ނޫޅޭކަމަށް އެމްޑީޕީން ބުނަމުން އަންނަނަމަ، މިހާރު އޮތް އަގުލަބިއްޔަތުން އެކަން ކުރަންވީނޫންތޯވެސް ރައީސް މުއިއްޒު ވަނީ ސުވާލު އުފައްދަވާފައެވެ.
އަޅުގަނޑު ވީ ވައުދެއް، ވީ ގޮތަށް އިރާދަކުރެއްވިއްޔާ ފުއްދާނަން. މިހާރުވެސް މި އަންނަނީ ފުއްދަމުން. އަދި ކުރިއަށް އޮތްތާވެސް ފުއްދާނަން.
ރައީސް ޑރ. މުޙައްމަދު މުއިއްޒު ވިދާޅުވިއެވެ.
ރައީސް މުއިއްޒު އިތުރަށް ވިދާޅުވީ، ޤައުމީ ސަލާމަތާގުޅޭ ބޮޑެތި ކަންކަމަށް ހައްލު ގެނައުމަށް އެންމެ އިސްކަމެއް ދިނުމަށްފަހު ދެން އެންމެ އިސްކަމެއް ދޭ ކަމަކީ ރައްޔިތުންނަށް ގެދޮރުވެރިކަމުގެ މައްސަލައަށް ޙައްލެއް ހޯދައިދިނުން ކަމަށާއި އެކަން އެމަނިކުފާނު ވައިދުވެވަޑައިގެންނެވި ގޮތަށް މި ފަސް އަހަރުގެ ތެރޭގައި ފުއްދަާނެކަމަށެވެ.
އޭރުގަ އޮތް ސަރުކާރުން، ހަމަ އެބޭފުޅުންނަށް އެއްކަލަ މެޖޯރިޓީ މަޖިލީހުގައި އޮޮވެ، ފަސް އަހަރު ވެގެން ދިޔައިރުގަ ސަރުކާރުވެސް އޮވޭ. މަޖިލިސް ވެސް އޮވޭ. އެ ފަސް އަހަރު ނިމެން ދެތިން މަހަށް / ހަފްތާއަކަށް ވީމަ ދިން ގޯތިތައް ނުވަތަ ދޭން އިއުލާންކުރި ގޯތިތައް. ކުރިން ނުދިން ސަބަބެއް ވެސް އޮންނަން ވާނެތާ.
ރައީސް ޑރ. މުޙައްމަދު މުއިއްޒު ވިދާޅުވިއެވެ.
މިހުރިހާ ސަބަބުތަކާއެކު ރައީސް މުއިއްޒު ވިދާޅުވީ، ކުރިއަށް އޮތް މަޖިލީސް އިންތިހާބަކީ، ގައުމުގެ މުސްތަގުބަލު، ރައްޔިތުން އެންމެ އެދޭގޮތަށް ދެމެހެއްޓުމަށްޓަކައި، ވަރަށް މުހިއްމު ގައުމީ ނިންމުމެއް ނިންމަން ޖެހޭ އިންތިހާބެއް ކަމަށެވެ.
Advertisement
This content is created and paid for by advertisers and does not involve Voice Journalists
