މަޖިލީހުގައި ސަރުކާރުގެ އަގުލަބިއްޔަތު ނެތުމުން މަޖިލީހުން ފެނިގެންދަނީ ސިޔާސީ ބޭނުމުގައި ސަރުކާރަށް ޖެއްސުން ކުރާތަން ކަމަށް ޕީޕީއެމްގެ ނާއިބު ރައީސް އަދި މަސްވެރިކަމާއި ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.

ޝިޔާމް މިހެން ވިދާޅުވީ މަޖިލިސް އިންތިހާބަށް ވާދަކުރައްވާ ތިނަދޫ އުތުރު ދާއިރާގެ ސަރުކާރުގެ ކެންޑިޑޭޓް ސަޢުދުالله ޙިލްމީގެ ފަރާތުން ރޭ ހުޅުމާލޭގައި ބޭއްވި ޚާއްސަ ތަރަވީހެއްގެ ތެރެއިން އެ ހަރަކާތުގައި ވާހަކަދައްކަވަމުންނެވެ.

ވަޒީރު ޝިޔާމް ވިދާޅުވީ، ރައީސް ޑރ. މުޙައްމަދު މުއިއްޒުއަށާއި މި ސަރުކާރަށްވެސް މިއަދު ވަރަށް ބޮޑެތި ގޮންޖެހުންތަކެއް އެބަހުރި ކަމަށާއި އެ ގޮންޖެހުންތައް ކުރިމަތި ކުރުވަނީ ރައްޔިތުންގެ މަޖިލީހުން ކަމަށެވެ.

ޝިޔާމް ވިދާޅުވީ، މިއަދު މި ފެނިގެންދަނީ މަޖިލީހުގައި ސަރުކާރުގެ އަޣުލަބިއްޔަތު ނެތުމުގެ ސަބަބުން މަޖިލީހުން ސިޔާސީ މަގްސަދު ހާސިލްކުރުމުގެ ބޭނުމުގައި ރައީސް އަށާއި މި ސަރުކާރަށް ޖެއްސުން ކުރަމުންދާ މަންޒަރު ކަމުގައެވެ. އެކަމުގެ ސަބަބުން ހުރިހާ ގެއްލުމެއް ލިބިިގެންދަނީ ދިވެހި އެންމެހާ ރައްޔިތުންނަށް ކަމށް ޝިޔާމް ފާހަގަކުރެއްވިއެވެ.

ޝިޔާމް އިތުރަށް ވިދާޅުވީ، ރައީސް މުއިއްޒު ގެންނެވި މެނިފެސްޓޯއާއި ތަސައްވުރު ހާސިލުކުރެވޭނެ ގޮތަށް ރައްޔިތުންގެ މަޖިލީހުގެ ކަންކަން ބައްޓަންވާންޖެހޭނެ ކަމަށެވެ. މިހާރު މި އޮތް ހާލަތު ބަދަލުކުރައްވަން ޖެހިފައިވާކަން ފާހަގަކުރައްވައި ޝިޔާމް ވިދާޅުވީ، ރައްޔިތުންގެ މަޖިލީހުން މިހާރު ޢަމަލުކުރަމުންދާ ލާދުސްތޫރީ ނިޒާމަކަށް ދިވެހިރާއްޖޭގެ ދުސްތޫރު ތަންނުދޭނެ ކަމުގައެވެ.

އެހެންކަމުން ރަށްރަށާއި މާލެއަށް ރައީސް މުއިއްޒު ގެންގުޅުއްވާ ތަރައްގީގެ މަޝްރޫޢުތައް ބާރަށް ކުރިއަށް ގެންދެވޭނެ ގޮތަށް ރައްޔިތުންގެ މަޖިލީހުގެ ކަންކަން ބައްޓަންކޮށްދެއްވުމަށް ދިވެހި ރައްޔިތުންގެ ކިބައިން ޝިޔާމް ވަނީ އެދިވަޑައިގެންފައެވެ.