ރަޝިއާގެ ކްރޯކަސް ސިޓީ ހޯލަށް ހުކުރު ދުވަހުގެ ރޭ ހަމަލާދިން ކަމަށް ތުހުމަތުކުރެވޭ 4 މީހެއްގެ މައްޗަށް އެގައުމުގެ ކޯޓުން ޓެރަރިޒަމްގެ ދައުވާ އުފުލައިފިއެވެ.

ހަމަލާގެ ޒިންމާ އައިއެސްއިން ނަގާފައިވާއިރު، މިއަދު ކޯޓަށް މި 4 މީހުން ހާޒިރު ކުރި އިރު އޭގެ ތެރެއިން އެކަކު ހާޒިރުކޮށްފައިވަނީ ފުރޮޅުލީ ގޮނޑިއެއްގައެވެ.

ތަޖަކިސްތާނަށް ނިސްބަތްވާ މި 4 މީހުންނާއި ސުވާލު ކުރުމަށް ކުރިއަށް ގެންދިޔަ ތަހުގީގު ސެޝަން ގެ ތެރެއިން އެމީހުންނަށް ރަޝިއާގެ ސިފައިން އަނިޔާކޮށްފައިވާ ވީޑިއޯ މިހާރު ދައުރުވަމުން އަންނަ އިރު، އެތަނުން އެކަކަށް ކަރަންޓު ޝޮކް ދީފައިވާ ކަމަށް ވެސް ރިޕޯޓް ތައް ބުނެއެވެ.

މިރްޒޯޔެވް އާއި ރަޗަބަލިޒޯޑާ ކަމަށް ކޯޓުން ފާހަގަކުރި ދެ ފިރިހެނުންގެ ލޯ ކައިރި ކަޅުވެފައި ވާއިރު، ރަޗަބަލިޒޯޑާ ގެ ކަންފަތް ވަނީ ވަރަށް ބޮޑަށް ބެންޑޭޖް ވެސް ކޮށްފައެވެ. ދެން މި ހަމަލާގެ ތުހުމަތު ކުރެވޭ މީހުންގެ ތެރެއިން ފަރީދޫނީ ނަމަކަށް ކިޔާ މީހާގެ މޫނު ވަރަށް ބޮޑަށް ދުޅަވެފައިވާއިރު، ހަތަރުވަނަ މީހާ ކަމަށްވާ ފައިޒޯވް ހޮސްޕިޓަލް ގައުނެއްގައި ކޯޓަށް ހާޒިރުވެފައިވާއިރު، ކޯޓުގައި އޭނާ ހޭނެތިފައިވާކަން ވެސް ފާހަގަކޮށްލަން ޖެހެއެވެ. އަދި ފައިޒޯވް ގެ އެއް ލޯ ނެތް ކަމަށް ވެސް ރޮއިޓާސް ނިއުސް އެޖެންސީން ރިޕޯޓް ކުރެއެވެ.

ރަޝިއާގެ ކޯޓުން ނެރުނު ބަޔާނެއްގައި ބުނީ، މިމީހުންގެ ތެރެއިން މިރްޒޮޔެވް އާއި ރަޗަބަލިޒޯޑާ ވަނީ އެމީހުންގެ ކުށަށް އިއުތިރާފް ވެފައި ކަމަށެވެ.

ބަޑި ހިފައިގެން ތިބި 4 މީހަކު މިދިޔަ ހުކުރު ދުވަހުގެ ރޭ ކްރޯކަސް ސިޓީ ހޯލަށް ވަދެ ބަޑިންނާއި އެއްޗެއް ގޮއްވާލައިގެން ހަމަލާ ދޭން ފެށީ ގާތްގަނޑަކަށް 6،000 މީހުން އެތަނުގައި އޮތް ކޮންސެޓެއް ބެލުމަށް އެއްވެ ތިއްބައެވެ. 

މި ހަމަލާގައި މިހާތަނަށް 137 މީހަކު މަރުވެ، 150 އަށް ވުރެ ގިނަ މީހުން ވަނީ ޒަހަމްވެފައެވެ. ހެއްކެއް ނެތް ނަމަވެސް ރަޝިއާއިން އަންނަނީ މިކަމުގައި މިކަމުގައި ޔޫކްރެއިން ގެ ޔޫކްރެއިން ބައިވެރިވުން އޮތް ކަމެއް ކަމަށްބުނެ އެ ގައުމަށް ތުހުމަތު ކުރަމުންނެވެ. އެހެންނަމަވެސް ޔޫކްރެއިންގެ ރައީސް ވޮލޮޑިމިއާ ޒެލެންސްކީ މި ތުހުމަތުތައް އިންކާރު ކޮށްފައިވާއިރު، އެމެރިކާއިން ވެސް ވަނީ މިކަމުގައި ޔޫކްރެއިންގެ އަތެއް ނެތް ކަމަށާއި، މިކަމުގެ ފުރިހަމަ ޒިންމާ އައިއެސް އިން ނަގާފައިވާކަމަށް ބުނެފައެވެ.