ރަޝިއާގެ ކްރޯކަސް ސިޓީ ހޯލަށް ހުކުރު ދުވަހުގެ ރޭ ދިން ހަމަލާ އާއި ގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުއިއްޒު އެ ގައުމުގެ ރައީސް ލަޑީމިއާ ޕުޓިން އަށް ތައުޒިޔާގެ މެސެޖެއް ފޮނުއްވައިފިއެވެ.

ރައީސް ޑރ.މުއިއްޒުގެ މި ތައުޒިޔާ މެސެޖްގައި އެމަނިކުފާނު ވަނީ، ރަޝިއާގެ މޮސްކޯގައި ދިން މި ޓެރަރިސްޓް ހަމަލާގައި ސަތޭކަ އަށް ވުރެ ގިނަ މައުސޫމް މީހުންގެ ފުރާނަ ގެއްލި އެތައް ބަޔަކު ޒަހަމްވި ހަބަރު އަޑުއެއްސެވީ ސިހުމާއި ބިރުވެރިކަމާއި އެކުގައި ކަމަށް ވިދާޅުވެފައެވެ.

މީގެ އިތުރުންވެސް ރައީސް ޑރ.މުއިއްޒު ވިދާޅުވީ، ރާއްޖެއިން މި ހަމަލާ ހަރުކަށި އިބާރާތުން ކުށްވެރި ކުރާ ކަމަށާއި، ޓެރަރިޒަމަށް މަގުފަހިވާ އެންމެހާ ކަންކަމާއި ރާއްޖެއިން އަބަދުވެސް ދެކޮޅުވެރިވާނެ ކަމަށެވެ. 

މި މެސެޖް ނިންމަވާލައްވަމުން ރައީސް ޑރ.މުއިއްޒު ވަނީ މި ހަމަލާގެ އަމާޒަކަށްވި އާއިލާތަކަށާއި އާންމު ފަރުދުންނަށާއި ރަޝިއާގެ ސަރުކާރަށް، ރާއްޖޭގެ ސަރުކާރާއި ރައްޔިތުންގެ ނަމުގައި ތައުޒިޔާ ވިދާޅުވެފައެވެ.

ބަޑި ހިފައިގެން ތިބި 4 މީހަކު މިދިޔަ ހުކުރު ދުވަހުގެ ރޭ ރަޝިޔާގެ ކްރޯކަސް ސިޓީ ހޯލަށް ވަދެ ބަޑިންނާއި އެއްޗެއް ގޮއްވާލައިގެން ހަމަލާ ދޭން ފެށީ ގާތްގަނޑަކަށް 6،000 މީހުން އެތަނުގައި އޮތް ކޮންސެޓެއް ބެލުމަށް އެއްވެ ތިއްބައެވެ. 

މި ހަމަލާގައި މިހާތަނަށް 137 މީހަކު މަރުވެ، 150 އަށް ވުރެ ގިނަ މީހުން ވަނީ ޒަހަމްވެފައެވެ. ހެއްކެއް ނެތް ނަމަވެސް ރަޝިއާއިން އަންނަނީ މިކަމުގައި މިކަމުގައި ޔޫކްރެއިން ގެ ޔޫކްރެއިން ބައިވެރިވުން އޮތް ކަމެއް ކަމަށްބުނެ އެ ގައުމަށް ތުހުމަތު ކުރަމުންނެވެ. އެހެންނަމަވެސް ޔޫކްރެއިންގެ ރައީސް ވޮލޮޑިމިއާ ޒެލެންސްކީ މި ތުހުމަތުތައް އިންކާރު ކޮށްފައިވާއިރު، އެމެރިކާއިން ވެސް ވަނީ މިކަމުގައި ޔޫކްރެއިންގެ އަތެއް ނެތް ކަމަށާއި، މިކަމުގެ ފުރިހަމަ ޒިންމާ އައިއެސް އިން ނަގާފައިވާކަމަށް ބުނެފައެވެ.