ޖަޕާނު ސަރުކާރުން ރާއްޖެއަށް 6.5 މިލިއަން ޑޮލަރުގެ އެހީއެއް ދީފިއެވެ.

ކަނޑުގެ ސަރަހައްދު ބެލެހެއްޓުމާއި ގުޅޭ މަސައްކަތްތަކާއި، ގުދުރަތީ ކާރިސާތަކުން ރައްކާތެރިވުމާއި ގުޅޭ މަސައްކަތްތަކަށް ޖަޕާން ސަރުކާރުން ރާއްޖެއަށް ދިން އެހީ އާއި ގުޅޭ އެއްބަސްވުމުގައި ރާއްޖޭގެ ފަރާތުން  ޚާރިޖީ ވަޒީރު މޫސާ ޒަމީރު ސޮއި ކުރައްވާފައިވާއިރު، ޖަޕާން ސަރުކާރުން ސޮއިކުރެއްވީ އެގައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޓަކެއުޗީ މިޑޯރީއެވެ.

މިކަމާއި ގުޅިގެން ޚާރިޖީ ވުޒާރާއިން ނެރުނު ބަޔާނުގައި ވާގޮތުން މި އެއްބަސްވުމުގެ ދަށުން ޖަޕާނުން ވެދޭ އެހީތަކަކީ:

1) ކަސްޓަމްސްއިން ޕެޓްރޯލްކުރުމަށް އުޅަނދު ހަދިޔާކުރުމާއި މެރިޓައިމް ސޭފްޓީއާއި ސެކިއުރިޓީގެ ދާއިރާ ކުރިއެރުވުމަށް 260 މިލިއަން ޔެން ނުވަތަ 1.87 މިލިއަން ޑޮލަރު

2) އުޅަނދުތަކަށް ބޭނުންވާ ސާމާނު ގަތުމަށް 56 މިލިއަން ޔެން ނުވަތަ 403،000 ޑޮލަރު

3) ގުދުރަތީ ކާރިސާތަކުން ރައްކާތެރިވުމާއި ގުޅޭ މަސައްކަތްކަށް 600 މިލިއަން ޔެން ނުވަތަ 4.32 މިލިއަން ޑޮލަރު

މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު މޫސާ ޒަމީރު ވަނީ ޖަޕާނަކީ އަބަދުވެސް ރާއްޖެއާ ގާތްގުޅުމެއް ބާއްވާ ޤައުމެއްކަން ފާހަގަކުރައްވާ، މި ހަމަޖެހުނު އެހީގެ ދަށުން ފެން ބޮޑުވުން ފަދަ ހާދިސާތަކަށާއި، އަލިފާނުގެ ހާދިސާތަކުން ރައްކާތެރިވުމަށް އެހީތެރިކަން ލިބިފައިވާކަމަށް ވިދާޅުވެފައެވެ.

މީގެ އިތުރުންވެސް ވަޒީރު ވިދާޅުވީ ފާއިތުވެ ދިޔަ 56 އަހަރުގެ ތެރޭގައި ޖަޕާނުން ރާއްޖެ އަށް އެކި ދާއިރާތަކުން އެހީތެރިކަން ފޯރުކޮށްދީފައިވާކަމަށެވެ.

މި އެހީގެ އެއްބަސްވުމުގައި ސޮއި ކުރުމަށް ބޭއްވި ރަސްމިއްޔާތުގައި ޚާރިޖީ ވުޒާރާ އާއި މާލީ ވުޒާރާގެ އިސްވެރިންނާއި، މޯލްޑިވްސް ކަސްޓަމްސް ސަރވިސް އާއި ނޭޝަނަލް ޑިޒާސްޓަރ މެނޭޖްމަންޓުގެ އިސްވެރިންގެ އިތުރުން ޖަޕާން އެމްބަސީގެ އިސްވެރިން ބައިވެރިވެ ވަޑައިގަތެވެ.