ނޯތު އަދި ސެންޓްރަލް އެމެރިކާގެ ގައުމުތަކުގެ މެދުގައި ކުޅެވޭ ކޮންކާކަފް ނޭޝަންސް ލީގު ފައިނަލުގައި މިއަދު ހެނދުނު 2-0 ގެ ނަތީޖާއަކުން މެކްސިކޯ ބަލިކޮށް އެމެރިކާ އިން ޗެންޕިއަންކަން ހޯދައިފި އެވެ.

މިއީ މިމުބާރަތުގެ ޗެންޕިއަންކަން އެމެރިކާ އިން ޖެހިޖެހިގެން ހޯދި ތިންވަނަ ފަހަރެވެ. މީގެ ކުރިން އެގައުމުން ވަނީ 2019/20 އަދި 2022/23 ގައި ބޭއްވުނު މުބާރާތް ވެސް ކާމިޔާބުކޮށްފައެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި އެމެރިކާ އިން ލީޑު ހޯދީ ފުރަތަމަ ހާފުގެ 45 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ޕްރެމިއާ ލީގުގެ ބޯންމައުތަށް ކުޅެމުން އަންނަ މިޑްފީލްޑަރު ޓެއިލާ އެޑަމް އެވެ. މިއީ އެޓީމުގެ ޔުވެންޓަސް މިޑްފީލްޑަރު ވެސްޓަން މެކެނީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މީގެ އިތުރުން ވެސް މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން އެމެރިކާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މިމެޗުގައި އެމެރިކާ އިން ލީޑު ފުޅާކުރި ލަނޑު ދެވަނަ ހާފުގެ 62 ވަނަ މިނެޓުގައި ކާމިޔާބުކޮށްދިނީ ޕްރެމިއާ ލީގުގެ ނޮޓިންހަމް ފޮރެސްޓަށް ކުޅެމުން އަންނަ މިޑްފީލްޑަރު ޖިއޮވާނީ ރޭނާ އެވެ. މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން އެމެރިކާ ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ އެމެރިކާގެ މިޑްފީލްޑަރު ޓެއިލާ އެޑަމް އެވެ.

ރޭފަތިހު ކުޅެވުނު މިމުބާރާތުގެ ތިންވަނަ ހޮވި މެޗުގައި 1-0 ގެ ނަތީޖާއަކުން ޕެނަމާ ބަލިކޮށް މުބާރާތުގެ ތިންވަނަ ހޯދީ ޖެމެއިކާ އިންނެވެ.