ގެދޮރު އިމާރާތް ކުރުމަށް ދޫކުރާ ލޯން ވަރަށް އަވަހަށް ދޫކުރަން ފަށާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައްޔިތުންގެ މަޖިލީހުގެ އިންތިހާބުގައި މައްޗަންގޮޅި މެދު ދާއިރާއަށް ވާދަކުރައްވާ ޕީޕީއެމް-ޕީއެންސީން ތާއީދުކުރާ ކެނޑިޑޭޓް އަހުމަދު ޒަމީރުގެ ކެމްޕެއިން ޖަލްސާގައި ރޭގައި ވާހަކަފުޅު ދައްކަވަމުން ރައީސް ޑރ.މުއިއްޒު ވިދާޅުވީ މި ލޯން ދޫކުރާނީ ފަސް ޕަސަންޓަށް ވުރެ އިންޓްރަސްޓް ބޮޑުނުވާ ގޮތަށް ކަމަށެވެ.
ރިޔާސީ އިންތިޚާބުގެ ކެމްޕޭންގައި، ގެދޮރުގެ މައްސަލަ ހައްލު ކުރެއްވުމަށް އަލަށް އެތައް ކަންތައްތަކެއް ކުރެއްވުމަށް ވައުދުވެވަޑައިގެންނެވި ކަން ފާހަގަކުރައްވަމުން ރައީސް މުއިއްޒު ވިދާޅުވީ، އެމަނިކުފާނު ވެވަޑައިގެން ވައުދުތަކުގެ ތެރޭގައި ފަސް ޕަސަންޓަށްވުރެ އިންޓްރަސްޓް ރޭޓް މަތިނުވާނެ ލޯން ސްކީމްތަކެއް ތައާރަފުކުރުން ހިމެނޭ ކަމަށާއި މިއީ އަމިއްލަ ގެ ހެދުމަށްޓަކައި އަތްފޯރާފަށުގައި ލުއި ލޯނުތަކެއް ތައާރަފުކުރުމަށް ދޭ ލޯނު ސްކީމެއް ކަމަށެވެ.
"އެއީ މި މާލޭ ސިޓީގައި ވިޔަސް އެހެން ރަށްތަކުގައި ވިޔަސް އަމިއްލަ ގެދޮރު ހުރެ، ގޯތީގައި ގެއެއް އިމާރާތް ކުރެވޭނެ ފަދަ ތަނަވަސްކަން ނެތް އާންމުކޮށް މި ހުންނަ ކޮމާޝަލް ރޭޓްތަކުގައި ބޭންކަށް ގޮސް ލޯނު ނަގައިގެންގެ ނެހެދޭނެ މީހުންނަށް އަތްފޯރާފަށުގައި ލުއި ލޯނުތަކެއް ތައާރަފުކުރުމަށް އަމިއްލަގެ ހެދުމަށްޓަކައި ދޭ ލޯން ސްކީމެއް،"
ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވީ، މި ލޯން ސްކީމް ތައާރަފް ކުރުމަށްޓަކައި މިދިޔަ 100 ދުވަހުގެ ތެރޭގައި ވަރަށް ގިނަ މަސައްކަތް ކުރެވި މިހާރު ގާތްގަނޑަކަށް ފަންނީ ޓެކްނިކަލް މަސައްކަތްތައް ނިމުކަކާ ހަމައަށް ގޮސްފައިވާ ކަމަށާއި ލޯން ސްކީމް އިއުލާން ކުރެވޭ ހިސާބަށް މަސައްކަތް ނިމިފައިވާ ކަމަށެވެ.
"މިތާނގައި މާދަމާ ލޯން ސްކީމަށް ހުޅުވާލާނެ ކަމަށް އިއުލާނު ކުރާނެ ކަމަށް ނުދެންނެވުނަސް މިހާރު އެ ވަނީ ގާތްގަނޑަކަށް ލޯން ސްކީމް އިއުލާން ކުރެވޭ ހިސާބަށް ގެންދެވިފައި، ކަމާއިބެހޭ މިނިސްޓްރީން ސަރުކާރުގެ ތެރެއިން ހުރިހާ ތަފްސީލާކާއެކު، އަމިއްލަ ގޯތީގައި ގެދޮރު އެޅުމަށްޓަކައި އަތްފޯރާފަށުގެ ލޯން ސްކީމް ހުޅުވާލާ އޭގެ ދަށުން ލޯން ހޯދައިގެން އެޅޭނެ. މި ލޯންތަކަކީ ކޮންވެންޝަނަލް އަދި އިސްލާމިކް ލޯން، ދެ އޮޕްޝަން ލިބޭނެ،"
ރައީސް މުއިއްޒު ވިދާޅުވިއެވެ.
ހަދަން ފަށާފައި ނުނިމި ހުރި ގެތައް ހެދުމަށްޓަކައި "ހޯމް ކޮމްޕްލީޝަން" ލޯން ސްކީމެއް ވަރަށް އަވަހަށް ތައާރަފު ކުރައްވާނެ ކަމަށާއި، އޭގެ އިތުރުންވެސް ގިނަދުވަސްވެ މަރާމާތު ކުރަން ޖެހިފައި ހުރި ގެތައް ހެދުމަށް ވެސް ލޯން ސްކީމެއް ތައާރަފު ކުރައްވާނެ ކަމަށެވެ. މި ހުރިހާ ލޯން ތަކަކީ ވެސް އަތްފޯރާ ފަށުގެ ލޯންތަކެއްކަން އެމަނިކުފާނު ފާހަގަކުރެއްވިއެވެ.
ރައީސް ޑރ.މުއިއްޒު ވިދާޅުވީ މުޅި ރާއްޖެ އަށް ހުޅުވާލާ މި ދެ ލޯން ސްކީމް ތައާރަފު ކުރުމަށްޓަކައި މަސައްކަތްތައް ފެށިފައިވާ ކަމަށެވެ. މިލޯން ސްކީމް ތަކުގެ ތެރެއިން ފުރަތަމަ ދޫކުރާނީ އަލަށް ގޯތީގައި ގެދޮރު އެޅުމަށްޓަކައި ދޫކުރާ ލޯންތައް ކަމަށާއި، އެއަށްފަހު އަނެއް ދެ ލޯން ސްކީމް ވެސް މިއަހަރުގެ ތެރޭގައި ދޫކުރަން ފަށާނެ ކަމަށް ވެސް އެމަނިކުފާނު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
