ގަވާއިދާއި ޚިލާފަށް މަގުމަތީ ކުނިބެހެއްޓުމުގެ އިތުރުން، މަގުމަތީގައި މުދާ ބަހައްޓައިގެން ވިޔަފާރި ކުރާތީ އިއްޔެ އެކަނިވެސް 18 ފަރާތެއް މާލެ ސިޓީ ކައުންސިލުން ޖޫރިމަނާ ކޮށްފިއެވެ.

މާލެ ސިޓީ ކައުންސިލުން މިކަން ހާމަކޮށްފައިވަނީ އެ ކައުންސިލުން އެކްސްގައި ކުރި ޕޯސްޓެއްގައެވެ.

މާލޭގެ މަގުމައްޗަށް ކުނި އަޅާ ނަމަ، 500ރ. އިން ޖޫރިމަނާ ކުރާއިރު، ކުނި އެޅުމުގެ ސަބަބުން މިދިޔަ ފެބްރުއަރީމަހުން ފެށިގެން މިހާތަނަށް އައިއިރު، 100 އަށްވުރެ ގިނަ މީހުން ވަނީ ޖޫރިމަނާކޮށްފައެވެ. މީގެ އިތުރުންވެސް މާލޭގެ މަގުމައްޗަށް ކުނި އަޅާ މީހުން ލައްވާ ކުނި ނަގަމުންދާކަން ވެސް ފާހަގަކޮށްލެވެއެވެ.

މާލެ ސަރަހައްދު ސާފުކޮށް ބޭއްވުމަށްޓަކައި މާލެ ސިޓީ ކައުންސިލުން ދަނީ މާލޭގެ ގިނަ ސަރަހައްދުތަކުން ކުނި ނަގާ ސާފު ކުރަމުންނެވެ. މިގޮތުން އިއްޔެ އެކަނިވެސް ޖުމުލަ 31 ޓަނުގެ ކުނި ނެގުނު ކަމަށް އެ އިދާރާއިން ހާމަކުރެއެވެ.