ރައްޔިތުން އިންތިހާބު ކުރި ވެރިއެއްގެ އިތުބާރު ދޮޅުމަސް ދުވަހުން ގެއްލެންވީ ކީއްވެތޯ އިކޮނޮމިކް މިނިސްޓަރު މުޙައްމަދު ސައީދު ސުވާލު އުފައްދަވައިފިއެވެ.

ރައްޔިތުންގެ މަޖިލީހުގެ ހޯރަފުށީ ދާއިރާއަށް ވާދަކުރައްވާ ސަރުކާރުގެ ކެންޑިޑޭޓް ޢަލީ މޫސާގެ ކެމްޕެއިން ޖަލްސާ ޝަރަފުވެރިކޮށްދެއްވައި، ހޯރަފުށީގައި ދެއްކެވި ވާހަކަފުޅުުގައި މިނިސްޓަރު ސަޢީދު ވިދާޅުވީ، މިގޮތަށް އިތުބާރުގެއްލޭ ކަންކަން ކުރައްވަމުން ގެންދަވަނީ މިހާރުވެސް ސުޕާމެޖޯރިޓީ އޮތް އެމްޑީޕީއިން ކަމުގައެވެ.

އަދި މި ދިވެހިރާއްޖެ މިހާރު އޮތް ގޯސް ހާލަތައް ގެނައުމުގެ ފަހަތުގައިވެސް އޮތީ މިއަދުގެ އެމްޑީޕީ ސުޕާމެޖޯރިޓީކަމަށް ސައީދު ވިދާޅުވިއެވެ.

މިނިސްޓަރު ސައީދު ވިދާޅުވީ ގައުމު އެހާލަތަށް ވައްޓާލި އެމްޑީޕީން މިއަދު ބުނަމުންގެންދަނީ މިސްރާބު ހަމަމަގަށް އެޅުވުމަށް އެޕާޓީއަށް ފުރުސަތެއް ދެއްވުމަށް ކަމަށެވެ. 

މިނިސްޓަރު ސަޢީދު ވިދާޅުވީ، ރައީސް ޑރ. މުޙައްމަދު މުއިއްޒުއަށް މުޅި ރާއްޖޭގެ ހުރިހާ ރައްޔިތުން ދެއްވި އިތުބާރާއި މެންޑޭޓު ފުރިހަމަ ބާރުމިނުގައި ކުރިއަށް ގެންދިއުމަށްޓަކައި އެމަނިކުފާނަށް މަޖިލީސް ދެއްވުމަށް އެދިވަޑައިގަންނަވާ ކަމަށެވެ.

މުޅި ރާއްޖެވެސް ސަރުކާރުގެ ކެންޑިޑޭޓުން ގެނައުމަށާއި ރައްޔިތުންގެ އުއްމީދުތައް މާޔޫސްކޮށް ނުލައްވާނެކަމުގެ ޔަގީންކަން މިނިސްޓަރު ސަޢީދު ވަނީ ދެއްވާފައެވެ.