މި ސަރުކާރުން ސިޔާސީ ލީޑަރުން ހައްޔަރުކުރަން ތައްޔާރުވަމުން ދާކަމަށް ކުރީގެ ރައީސް އަދި އިދިކޮޅު އެމްޑީޕީގެ އެޑްވައިޒަރު އިބްރާހިމް މުހައްމަދު ޞާލިހު ވިދާޅުވެއްޖެއެވެ.
އެމްޑީޕީން ކުރިއަށް އޮތް މަޖިލިސް އިންތިހާބަށް ކުރަމުންދާ ކެމްޕޭންގެ ތެރެއިން ރޭގައި ލޮނުޒިޔާރަތްކޮޅުގައި ބޭއްވި ހަރަކާތެއްގައި ވާހަކފުޅު ދައްކަވަމުން ޞާލިހު ވިދާޅުވީ، ފެންނަމުންދަނީ ސަރުކާރުން މިގައުމު މީގެ 20 އަހަރު ފަހަތަށް ގެންދަން އުޅޭ ތަން ކަމަށާއި، ހުދުމުހުތާރު ވެރިކަމެއްގެ ސިފަ ބަރާބަރަށް ހަމަވަމުންދާއިރު، ވަޒީފާގެ ބިރު އިންތިހާ އަށް ކުރިމަތިކުރަމުންދާ ކަމަށެވެ.
އެމްޑީޕީގެ ޗެއާޕާސަން ފައްޔާޒު އިސްމާއީލް މިއަދު ޕޮލިހަށް ހާޒިރު ވުމަށް އަންގާފައިވާތީ އެކަމާއި ގުޅިގެން ރައީސް ޞާލިހު ވިދާޅުވީ، ފައްޔާޒު ޕޮލިހަށް ހާޒިރު ކުރަނީ އެއްވެސް އަސާސެއް ނެތް ކަމެއްގައި ކަމަށާއި މި ފެންނަނީ ސިޔާސީ ލީޑަރުންނާއި ދިމާކުރި މަންޒަރު ކަމަށެވެ.
"ބިރުވެރިކަން އިންތިހާއަށް ކުރިމަތިވަމުން މިދަނީ. ސިޔާސީ ހަރަކާތެއް ހިންގޭކަށް ނެތް. ސިޔާސީ ލީޑަރުން ހިފާ ހައްޔަރުކުރަން ތައްޔާރުވަމުން އެދަނީ,"
ރައީސް ޞާލިހު ވިދާޅުވިއެވެ.
ސިޔާސީ ލީޑަރުން ހައްޔަރު ކުރުމާއި ހިސާބުން މިކަން ނުނިމޭނެ ކަމަށާއި، ފަނޑިޔާރުންނާއި ޕޮލިސް ކޮމިޝަނަރުން ހައްޔަރުކޮށް މިނިވަން މުއައްސަސާތައް ވެސް މުށުތެރެއަށް ލާނެ ކަމަށް ރައީސް ޞާލިހު ވިދާޅުވިއެވެ.
ރައީސް ޞާލިހު މީގެ 10 އަހަރު ކުރިން ރާއްޖެ އޮތް ހާލަތުގެ އިހުސާސު މިހާރު ކުރެވެން ފަށައިފި ކަމަށާއި, ރާއްޖޭގެ ކަންކަން ދޫކޮށްލައިގެން ތިބެއްޖެނަމަ އަނެއްކާ ވެސް އެ ބިރުވެރިކަމާ ނާމާންކަމުގެ ތެރެއަށް ގައުމު ދާނެ ކަމަށެވެ. މިކަމުގައި އެންމެން އެއްކޮށް ތެދުވަން ޖެހޭ ކަމަށާއި ދޫކޮށްލައިގެން ތިބެއްޖެ ނަމަ އަނެއްކާވެސް އެ ބިރުވެރިކަމާއި އަނިޔާވެރިކަމަށް ރާއްޖެ ދާނެ ކަމަށްވެސް ރައީސް ޞާލިހު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
