ރާއްޖޭގައި ޕާސްޕޯޓް ހެދުމުގެ ހިދުމަތް އަތޮޅު ކައުންސިލަތަކާއި ސިޓީ ކައުންސިލް ތަކުން ލިބޭނެ ގޮތް ހަމަޖެއްސުމަށް ނިންމާފައިވާކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު އާދަމް ޝަރީފް އުމަރު ވިދާޅުވީ މީގެ ސަބަބުން ކައުންސިލްތައް ބާރުވެރި ކުރުވި، ރައްޔިތުންނަށް ބޭނުންވާ ހިދުމަތް ލިބުމުގެ އިތުރުން ރައްޔިތުންގެ ޖީބަށް ލުއިވެގެންދާނެ ކަމަށެވެ.
ޕާސްޕޯޓު ހެދުމަށްޓަކައި ވަރަށް ގިނަ ފަރާތްތަކުން އެކަމަށް އެދި ހުށައަޅާކަން ފާހަގަކުރައްވަމުން ވަޒީރު ވިދާޅުވީ، ރާއްޖޭގެ އާބާދީގެ ބޮޑ ބައެއް ދިރިއުޅެމުންދަނީ ރާއްޖޭގެ އަތޮޅުތަކާއި ސިޓީތަކުގައި ކަމަށްވާތީ، ޕާސްޕޯޓު ހެދުމަށްޓަކައި މިހާރަށްވުރެ ފަސޭހަ ގޮތްތަކެއް ހަމަޖެއްސެވުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސިޔާސަތުގެ ތެރޭގައި ހިމެނޭ ކަމެއް ކަމަށެވެ.
"މިހާރު ސަރުކާރުން ނިންމާފައިވަނީ މިހާރު ޕާސްޕޯޓު ހެދުމަށް ކުރަމުން އައި މަސައްކަތް މުޅިން ތަފާތު އެހެން މަރުހަލާ އަކަށް ގެންދަވަނއި ކޮންމެ ސިޓީ އެއްގައި ވެސް އަދި ކޮންމެ އަތޮޅެއްގެ އަތޮޅު ކައުންސިލްގެ އިދާރާގައި ޕާސްޕޯޓު ހެދޭނެ އިންތިޒާމް ހަމަޖައްސަވައި އެކަންތައްތައް ކުރިއަށް ގެންދެވުން."
ވަޒީރު އާދަމް ޝަރީފް އުމަރު ވިދާޅުވިއެވެ.
ހަމައެއާއިއެކު ޕާސްޕޯޓުގެ ހެދުމުގެ ހިދުމަތުގެ އިތުރުން އައިޑީ ކާޑު މިހާރު ކުރިއަށްދާ ތަރުތީބަށްވުރެ ރަނގަޅު އިންތިޒާމެއްގެ ދަށުން އެކަން ކުރެވޭނެ ވިސްނުން ރައީސް ޑރ.މުއިއްޒު ހާމަކުރައްވައި، މިކަން ކުރެވޭނެ އިތުރު ގޮތްތައް ސަރުކާރުގެ ފަރާތުން ރާވަމުންދާ ކަމަށެވެ.
މި މަސައްކަތް ކުރިއަށް ގެންދާނީ ފިޔަވަހި ތަކަކަށް ބަހާލައިގެން ކަމަށާއި މިހާރުވެސް ރާއްޖޭގެ ސިޓީތަކާއި އަތޮޅު ކައުންސިލްތަކުން މި ކަމުގެ ޝައުގުވެރިކަން ފާޅުކޮށް މިކަމާއި ގުޅޭ އިންތިޒާމްތައް ބައެއް ކައުންސިލްތަކުން ފަށާފައިވާކަން ވަޒީރު ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
