ރާއްޖޭގެ އަތޮޅު ކައުންސިލްތަކާއި ސިޓީ ކައުންސިލް ތަކުގައި ޕާސްޕޯޓް ހެއްދުމުގެ ހިދުމަތް ފަށާއިރު، އިމިގްރޭޝަން ގެ އެހެނިހެން ހިދުމަތްތައް ވެސް ލިބިގެންދާނެ ކަމަށް އިމިގްރޭޝަންގެ ކޮންޓްރޯލަރ މުހައްމަދު ޝައްމާން ވަހީދު ވިދާޅުވެއްޖެއެވެ.

ހޯމް ސެންޓަރ އިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ޝައްމާން ވިދާޅުވީ، ދިވެހި ޕާސްޕޯޓުގެ ހިދުމަތުގެ އިތުރުން އަތޮޅު ތެރޭގައި ކައުންސިލްތަކުގައި އިމިގްރޭޝަންގެ އޮފީސް ގާއިމުވާ ހިސާބުން، އެއިދާރާއިން ދޭ ހިދުމަތްތައް ގާއިމު ކުރެވިގެންދާނެ ކަމަށެވެ.

ޝައްމާން ވިދާޅުވީ، އިމިގްރޭޝަންގެ އެހެނިހެން ހިދުމަތްތަކުގެ ތެރެއިން ހާއްސަކޮށް ގަވާއިދާއި ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ހުށައެޅޭ ޕްލޭނެއްގެ ތެރެއިން ކައުންސިލްތަކުގައި އުފެދޭ އޮފީސް ތަކާއި އެކީގައި މަސައްކަތް ކުރަމުންދާނެ ކަމަށެވެ.

މީގެ އިތުރުންވެސް ޝައްމާން ވިދާޅުވީ، ޕާސްޕޯޓުގެ ހިދުމަތް އަތޮޅު ތަކާއި ސިޓީ ކައުންސިލްތަކުން ހެއްދޭނެ ގޮތް ހަމަޖެހިގެން ދިޔުމުގެ ސަބަބުން ޕާސްޕޯޓުގެ އަގަށްވުރެ ޕާސްޕޯޓު ނަގަންދާ ހަރަދު ބޮޑު ކަމަށާއި، ރައީސް ޑރ.މުއިއްޒުގެ މި ނިންމެވުމުގެ ސަބަބުން ކުރިއަށް އޮތް ތަނުގައި ރައްޔިތުންގެ ޖީބަށް ވަރަށް ބޮޑުތަން ލުއިވެ ވަރަށް ބޮޑަށް ވަގުތު ސަލާމަތްވެގެންދާނެ ކަމަށެވެ.