ހުޅުމާލޭގައި "އިސްރަށްވެހިންގެ ނާދީ" ތަރައްޤީ ކުރުމަށް އިޖުތިމާއީ އަދި އާއިލީ ތަރައްގީއާ ބެހޭ ވުޒާރާ އާއި ހައުސިންގ ޑިވެލޮޕްމަންޓް ކޯޕަރޭޝަންއާއި ދެމެދު ފަހުމުނާމާއެއްގައި ސޮއިކުރައްވައިފިއެވެ.

މި ފަހުމުނާމާގައި އެޗްޑީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރ އިބްރާހިމް ފަޒުލް ރަޝީދެވެ. އަދި އިޖުތިމާއީ އަދި އާއިލީ ތަރައްގީއާ ބެހޭ ވުޒާރާގެ ފަރާތުން ވަޒީރު ޑރ. ޢާއިޝަތު ޝިހާމް އެވެ.

ހުޅުމާލޭގައިދިރިއުޅޭ އިސްރަށްވެރިންނަށް ޚާއްސަކުރެވިފައިވާ މި ނާދީއަކީ ހައުސިން ޑިވެލޮޕްމެންޓް ކޯޕަރޭޝަނުން، ދުރާލާ ފަށައިގެން ކުރިއަށް ގެންދަމުންދާ މަޝްރޫއެއް ކަމަށް އެ ކޯޕަރޭޝަނުން ބުނެފައިވެއެވެ. އަދި އެޗްޑީސީގެ ސީއެސްއާރުން ތަރައްޤީކުރާ މި ޕްރޮޖެކްޓުގެ 90 އިންސައްތަ މަސައްކަތް މިހާރު ވަނީ ނިމިފައި ކަމަށްވެސް ބުނެފައިވެއެވެ.

ހިޔާ ޓަވަރ 8 ގައި ބިނާކޮށް ތަރައްޤީ ކުރުމަށް ހަމަޖެހިފައިވާ މި ނާދީ ހިންގުން އިންތިޒާމުކޮށް ބަލަހައްޓާނީ އިޖުތިމާއީ އަދި އާއިލީ ތަރައްގީއާ ބެހޭ ވުޒާރާ އިންނެވެ. އެ ވުޒާރާއިން ވިދާޅުވެފައިވާ ގޮތުގައި، އިސްރަށްވެހިންގެ ނާދީއަކީ އިސްރަށްވެހިންގެ އިޖްތިމާއީ ދުޅަހެޔޮކަން އިތުރުކުރުމުގެ މަގުސަދުގައި ތަރައްޤީކުރެވޭ އިޖުތިމާޢީ މަރުކަޒެކެވެ.

އިސްރަށްވެހިންނަށް ހިތްހަމަޖެހުން ގެނެސްދިނުމަށްޓަކައި އެކިއެކި ޚިދުމަތްތައް އެކުލެވޭނެހެން ރާއްޖޭގެ އުތުރާއި ދެކުނާއި މެދުރާއްޖެތެރޭގައި މަރުކަޒުތަކެއް ޤާއިމުކުރުމަކީ ރައީސް ޑރ. މުޙައްމަދު މުޢިއްޒު ވެވަޑައިގަންވާފައިވާ ވަޢުދެކެވެ. އިސްރަށްވެހިންނަށް ޚާއްސަ އިޖުތިމާޢީ މަރުކަޒުތަކެއް ބިނާކުރުމަށް ސަރުކާރުން ފަށާފައިވާ މަޝްރޫޢުގެ ތެރެއިން، ފުރަތަމަ އިސްރަށްވެހިންގެ ނާދީއެއް ބިނާކޮށް ހުޅުވާފައިވަނީ، މާލޭގައި، މިދިޔަ މަހުގެ 17 ގައެވެ. މި މަރުކަޒަކީ އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ އިސްނެންގެވުމުގެ މަތިން ހަދާފައިވާ ތަނެކެވެ.

އިސްރަށްވެހިންގެ ނާދީ އަކީ މުޖުތަމަޢުގައި އިސްރަށްވެހިންގެ ދައުރު ފުޅާކުރުމަށާއި އެފަރާތްތަކުގެ ސިއްޙީ، ނަފްސާނީ އަދި އަދި އިޖުތިމާޢީ ދުޅަހެޔޮކަން އިތުރުކުރުމަށް މަގުފަހި ކޮށްދިނުމުގެ ގޮތުން ހުޅުވާ މަރުކަޒުތަކެކެވެ.