ވިލިމާލޭގައި މިހާރު ކުރިއަށްދާ "އޮބިއަން ޓީއެފްޓީ 11 ވަނަ ރަމަޟާން ފުޓްސަލް ޗެލެންޖު 2024" ގައި ހުކުރު ދުވަހުގެރޭ ކުޅެވުނު ފުރަތަަމަ މެޗުގައި ގުރޫޕް ޖީގެ ބީޖީ ސްޕޯޓްސް ކުލަބާއި ކްލަބް ލިއޮންސް ވާދަކުރި މެޗު 5-2 ގެ ނަތީޖާއަކުން ކާމިޔާބުކޮށް ގުރޫޕްގެ އެއްވަނަ ބީޖީ ސްޕޯޓްސް ކުލަބުން ހޯދައިފި އެވެ.

މުބާރާތުގައި ކްލަބު ލިއޮންސް ކުޅުނު ފުރަތަމަ މެޗުގައި 12-1 ގެ ތަފާތުބޮޑު ނަތީޖާއަކުން ވެލިއަންޓްސް އަތުން މޮޅުވިއިރު، ދެވަނަ މެޗުގައި އެޓީމުން ވަނީ ކުޑަ ވެސްޓް 15-0 ގެ ނަތީޖާއަކުން ބަލިކޮށްފައެވެ. އަދި ބީޖީގެ ފުރަތަަމަ މެޗުގައި 14-0 ގެ ނަތީޖާއަކުން ކުޑަ ވެސްޓް އަތުން މޮޅުވިއިރު، ދެވަނަ މެޗުގައި އެޓީމުން ވަނީ 8-1 ގެ ނަތީޖާއަކުން ވެލިއަންޓްސް ބަލިކޮށްފައެވެ.

ވިލިމާލޭ ފުޓްސަލް ދަނޑުގައި ކުޅެވުނު މި މެޗުގައި ފުރަތަަމަ ލަނޑުޖަހައި ކުރިހޯދީ ކްލަބް ލިއޮންސް އިންނެވެ. އެގޮތުން އެޓީމުން ދެލަނޑުގެ ލީޑެއް ހޯދާފައި ވަނިކޮށް ބީޖީ ސްޕޯޓްސް ކުލަބުން މެޗު ކާމިޔާބުކުރީ ފަހު ފަސް މިނެޓު ތެރޭގައި ކާމިޔާބުކުރި ފަސް ލަނޑާއެކު 5-2 ގެ ނަތީޖާއަކުންނެވެ.

މިމެޗުގައި ބީޖީ ސްޕޯޓްސް ކުލަބުގެ މުހައްމަދު އަނާން ތިން ލަނޑު ކާމިޔާބުކޮށް ހެޓްރިކް ހެދި އިރު، މުޒްދާން ހަސަން ވަނީ ދެލަނޑު ކާމިޔާބުކޮށްފައެވެ. މީގެ އިތުރުން މިމެޗުގައި ލިއޮންސްގެ ހަސަން ސަމީއު ސައީދު އަދި މުހައްމަދު ޝައިމް މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ބީޖީ ސްޕޯޓްސް ކުލަބުގެ މުޒްދާން ހަސަން އެވެ.

މިމެޗުން ލިބުނު ތިން ޕޮއިންޓާއެކު ކުޅުނު ތިން މެޗުން ވެސް މޮޅުވެ ގްރޫޕްގެ އެއްވަނަ ޓީމުގެ ގޮތުގައި ބީޖީ ސްޕޯޓްސް ކުލަބުން ދެވަނަ ބުރުގެ ޖާގައެއް ހޯދި އިރު، މިމެޗުން ބަލިވި ކުލަބު ލިއޮންސް ގުރޫޕް ސްޓޭޖުގައި ކުޅުނު ތިން މެޗުގެ ތެރެއިިން ދެމެޗުން މޮޅުވެ އެއް މެޗުން ބަލިވި ނަމަވެސް ގުރޫޕްގެ ދެވަނަ ޓީމުގެ ގޮތުގައި އެޓީމަށް ވެސް ވަނީ ދެވަނަ ބުރުން ޖާގަ ލިބިފައެވެ.

ޗެންޕިއަން ޓީމަށް 50,000 އަދި ރަނަރަޕް ޓީމަށް 30,000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު 32 ޓީމަކުން ބައިވެރިވެފައިވާއިރު މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 32 ޓީމު 8 ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު މުބާރާތުގެ ދެވަނަ ބުރަށް ހޮވޭގޮތަށެވެ.

މިމުބާރާތުގެ މެއިން ސްޕޮންސަރ އަކީ އޮބިއަން އެވެ. އަދި މުބާރާތުގެ މީޑިއާ ޕާޓްނަރަކަށް ހަމަޖައްސާފައި ވަނީ ވޮއިސް އެވެ.