އަމިއްލައަށް ޤާއިމުކުރެވެން ހުރި ކަންކަން އަމިއްލައަށް ޤާއިމުކުރުމަކީ ރައްޔިތުންގެ މުސްތަޤުބަލަށްޓަކާ އެޅޭނެ އެންމެ ވަރުގަދަ ބިންގާ ކަމުގައި، ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރޭގައި ބޭއްވި ޕީޕީއެމް / ޕީއެންސީ ކެމްޕެއިން ޖަލްސާގައި ރައީސް ޑރ. މުޙައްމަދު މުޢިއްޒު ވިދާޅުވީ ދިވެހިންގެ އަމިއްލަވަންތަކަން ޤާއިމުކުރަން މަސައްކަތް ކުރަންޖެހޭ ކަމަށެވެ. އެގޮތުން އަމިއްލައަށް އެއަރ އެމްބިއުލަންސް ގެ މަސައްކަތް ފެށުނު ކަން ފާހަގަ ކުރައްވާފައިވެއެވެ.
"އަމިއްލައަށް ކުރެވެން ހުރި ކަންކަން އެހެން މީހުންގެ ކިބައިން އެދިގެން، އެހެން މީހުންނަށް ބަރޯސާވުން، ރާއްޖޭގަ މިއޮތް އާދަކާދަ ނިމުމަކަށް ގެންނަން ޖެހޭ"
ރައީސް ޑރ.މުޢިއްޒު
މީގެ އިތުރުން، ރާއްޖޭގައި އުފެއްދޭ ކާ އެއްޗެހީގެ ބާވަތްތައް އެހެން ޤައުމުތަކުން އިމްޕޯޓު ކުރުން ނިމުމަކަށް ގެނެސް ރާއްޖޭގައި އަމިއްލައަށް، ކާބޯތަކެތި އުފެއްދުމަކީ އިޤްތިޞާދު ކުރިއެރުވުމަށް ކޮންމެހެންވެސް ބޭނުންވާ ކަމެއްކަމަށް ރައީސް ވިދާޅުވިއެވެ.
ދިވެހި ރާއްޖޭގައި އިމްޕޯޓުކުރެވޭ ކާބޯތަކެއްޗާއި އަޅާބަލާއިރު، ރާއްޖޭގައި އުފެއްދޭ ކާބޯތަކެތި، ނިސްބަތުގެ ގޮތުން ވަރަށް މަދެވެ. އެހެންކަމުން، ދިވެހިންނަށް ބަރޯސާވާން މަޖުބޫރުވެފައިވަނީ އިމްޕޯޓު ކުރެވޭ ކާބޯތަކެއްޗަށެވެ. މީގެ ތެރޭގައި ރާއްޖޭގައި ހެއްދޭ ބާވަތްތަކުގެ ކާނާވެސް ހިމެނޭއިރު، މި ބާވަތްތައް ރާއްޖޭގައި ހެއްދުމުގެ ބަދަލުގައި ބޭރުން ގެނައުމަކީ، އިޤްތިޞާދީ ގޮތުން ރާއްޖެ ކުރިއަރާ ދިޔުމަށް ގޮންޖަހާލާ ބޮޑު ހުރަހެކެވެ.
ރައީސް ވިދާޅުވިގޮތުގައި އިމްޕޯޓުގެ މައްސަލަ ޙައްލުކުރުމުގެ ފުރަތަމަ މަރުޙަލާއަކީ، ދިވެހި ރައްޔިތުންނަށް، ފުޑް ސެކިޔުރިޓީ ޤާއިމުކުރުމެވެ. އެގޮތުން އުތުރު ތިލަފަޅުގައި، 200 ހެކްޓަރުގެ ބިން ހިއްކައިގެން އިންޓެގްރޭޓް ޑިވެލޮޕްމަންޓާއެކު، އެގްރިކަލްޗަރ އިންޑަސްޓްރިއަލް ޒޯނެއް ޤާއިމު ކުރުމުގެ މަސައްކަތް ވަނީ ފަށާފައެވެ. މި ބޮޑު މަޝްރޫޢުގެ މަޤުސަދަކީ، ހުރިހާ ދިވެހިންނަށް ފުދޭ މިންވަރަށް، ދިވެހިރާއްޖޭގައި ކާބޯތަކެތި އުފެއްދުމެވެ.
ރޭގެ ޖަލްސާގައި ރައީސް ވިދާޅުވިގޮތުގައި، ދެވަނަ މަރުޙަލާއަކީ، ފަތުރުވެރިންނަށް ބޭނުންވާ ކާބޯތަކެތިވެސް ރާއްޖޭގައި އުފައްދާ ފޯރުކުރުމެވެ.
"އަޅުގަނޑުމެންގެ ކެޕޭސިޓީ، އަމިއްލައަށް ޤާއިމުކުރެވެން ހުރި ހުރިހާ ކަމެއްގަ ޤާއިމު ކުރުމަކީ އަޅުގަނޑުމެންގެ ޤައުމުގެ ރައްޔިތުންނަށްޓަކާ، މުސްތަޤުބަލަށްޓަކާ އެޅޭނެ އެންމެ ވަރުގަދަ ބިންގާ"
ރޭގެ ޖަލްސާގައި ރައީސް ވިދާޅުވެފައިވެއެވެ.
މި ދެ މަރުޙަލާ ފެށުމުން، ދިވެހިންނަށް އެތައް ހާސް ވަޒީފާގެ ފުރުސަތުތަކެއް ފަހިވާނެ ކަމަށާއި އެތައް ރައްޔިތުންނަކަށް ލިބޭ ޢަމްދަނީ އިތުރުވެ ދިވެހިންގެ ފުދުންތެރިކަން އިތުރުވާނެކަން ރައީސް ފާހަގަކުރައްވާފައިވެއެވެ.
މީގެ އިތުރުންވެސް އަމިއްލަވަންތަކަން ދިރުވުމަށް ރޭގެ ޖަލްސާގައި ރައީސް އިލްތިމާޒު ކުރެއްވިއެވެ. އެގޮތުން ކަންކަން ކުރުމަށް އިސްނެގުމަށް އެދިލައްވާ، މިނިވަން މުސްތަޤިއްލު ޤައުމެއްގެ އިޙުސާސް ކުރެވޭނީ ބޭރު ޤައުމުތަކަށް ބަރޯސާނުވެ، އަމިއްލައަށް ކަންކަން ކުރަން ފެށީމާކަމަށް ރައީސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
