ސިޔާސީ މީހުން ހައްޔަރު ކުރަން ފެށުމަކީ ސިޔާސީ ގޮތުން އެ ސަރުކާރެއް ގޮތް ހުސްވުންކަމަށް އިދިކޮޅު އެމްޑީޕީގެ އެޑްވައިޒަރު އަދި ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައީސް ޞާލިހު މިފަދައިން ވިދާޅުވީ އެމްޑިޕީން ކުރިއަށްގެންދާ މަޖިލިސް ކެމްޕޭންގެ ހަރަކާތުގެ ތެރެއިން ރޭގައި ބޭއްވި މުޅި ހުޅުމާލެ ތަރާވީސް ޖަލްސާގައި ވާހަކަފުޅު ދައްކަވަމުންނެވެ. އެގޮތުން ރައީސް ޞާލިހު ވިދާޅުވީ، އާރުޑީސީގެ ހިޔާނާތުގެ މައްސަލައިގައި އެމްޑީޕީގެ ޗެއާޕާސަން ފައްޔާޒް އިސްމާއިލް ފުލުހަށް ހާޒިރުކުރަން އެންގުމުން މި ސަރުކާރު ގޮތް ހުސްވެއްޖެކަން ފެނިގެން ދިޔަކަމަށެވެ. 

ސިޔާސީ މީހުން ގައިގައި "އަތްލަން" ފެށުމާއި އެއްވެސް އަސާސެއްނެތި، ފުލުހަށް ގެންގޮސް ތަހުގީގު ކުރަން ފެށުމަކީ ސިޔާސީ ގޮތުން އެ ސަރުކާރެއް ގޮތް ހުސްވުން ކަމަށާއި އެމްޑީޕީން މިކަމާއި ބިރު ނުގަންނާނެ ކަމަށް ވެސް ރައީސް ޞާލިހު ވިދާޅުވިއެވެ.

ފައްޔާޒް ފުލުހަށް ހާޒިރުވުމަށް އެންގުމާއި ގުޅިގެން މީގެ ކުރިންވެސް ރައީސް ޞާލިހު ވަނީ ކަންބޮޑުވުން ފާޅުކުރައްވާފައެވެ. 

ފައްޔާޒަށް ފުލުހުން ފޮނުވި ޗިޓުގައި ބުނެފައިވަނީ އާރްޑީސީއަށް ލިބޭ ފައިސާ އެކުންފުނީގެ ވެރިންނާއި އާރްޑީީސީ އާއި ގުޅުން އޮންނަ ފަރާތްތަކަށާއި ކުންފުނިތަކައް ދޫކޮށް އާރްޑީސީގެ ފައިސާއަށް ޚިޔާނާތްތެރިވި މައްސަލައާ ގުޅިގެން ފުލުހުންގެ އިދާރާއަށް ހާޒިރުވުމަށް އަންގާ ކަމަށެވެ.

މިކަމާއި ގުޅިގެން ރައީސް ޞާލިހު ވަނީ  އެ އިޔާދަވެގެންދަނީ ކުރީގައިވެސް  ދުށް އަނިޔާވެރިކަމާއި ޤާނޫނީ މުއައްސަސާތަކުގެ ބާރު ކަނޑުވާލުމުގެ ހިތި ސިލްސިލާ ކަމަށާއި އަނިޔާވެރި ނުވެވެސް ރައްޔިތުންނަށް ޚިދުމަތް ކުރެވޭނެކަމަށް ވިދާޅުވެފައެވެ. އަދި ސިޔާސީ ލީޑަރުން ހައްޔަރު ކުރުމާއި ހިސާބުން މިކަން ނުނިމޭނެ ކަމަށާއި، ފަނޑިޔާރުންނާއި ޕޮލިސް ކޮމިޝަނަރުން ހައްޔަރުކޮށް މިނިވަން މުއައްސަސާތައް ވެސް މުށުތެރެއަށް ލާނެ ކަމަށް ވެސް ރައީސް ޞާލިހު ވަނީ ވިދާޅުވެފައެވެ.