ދިވެހިރާއްޖޭގެ އިގްތިޞާދުގައި ބުންވަރު ޖެހޭ މިންވަރަކުން ހުރިހާ ދާއިރާއެއްގެ ވެސް މުސާރަ ބޮޑުކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވީ، ރައީސް އޮފީހުން ސިލްސިލާކޮށް ގެނެސްދޭ ރައީސް ގެ ޖަވާބުގެ ޕްރޮގްރާމްގައި ސަރުކާރު މުއައްޒަފުންގެ މުސާރަ ބޮޑު ކުރުމާއި މެދު ފުއައްމުލައް ސިޓީ، ނިއުވެލި، އަލީ ޝާފިއު ކުރި ސުވާލަށް ޖަވާބުދެއްވަމުންނެވެ.

މިގޮތުން އަލީ ޝާފިއު ވަނީ، ފުލުހުންގެ މުސާރަ ބޮޑުކޮށްފައި، އެހެނިހެން މުއައްސަސާތަކުގެ މުސާރަ ބޮޑު ކުރައްވަނީ ކޮން ދުވަހަކުތޯ ރައީސް މުއިއްޒު އާއި ސުވާލު ކުރައްވާފައެވެ.

Advertisement

މި ސުވާލަށް ޖަވާބު ދެއްވަމުން ރައީސް މުއިއްޒު ވިދާޅުވީ، ފުލުހުންނާއި ސިފައިން ހިމެނޭހެން މިހާރު ބައެއް ދާއިރާތަކުގެ މުސާރަ ބޮޑުކުރެވިފައިވާ ކަމަށާއި، އިގްތިސާދު ހަރުދަނާވަމުންދާ މިންވަރަކުން މިދައުރުގެ ތެރޭގައި ހުރިހާ ދާއިރާއެއްގެ ވެސް މުސާރަ ބޮޑުކޮށްދެއްވާނެ ކަމަށެވެ.

މީގެ އިތުރުންވެސް މިއަދުގެ ޕްރޮގްރާމްގެ ތެރޭގައި ރައީސް މުއިއްޒު ވިދާޅުވެފައިވަނީ ރަމަޟާން މަހުގެ ފަހު 10 ބަންދުކުރުމަށް ސަރުކާރުން ނިންމީ، ރޭއަޅުކަމުގައި ގިނަ ވަގުތު ހޭދަ ކުރުމަށް ފަސޭހަ ކޮށްދިނުމަށްޓަކައިކަމަށެވެ. އެގޮތުން ހެނދުނު ތެދުވެގެން އޮފީހަށް ދިޔުމަށްވުރެ މި ދުވަސްތައް އެއްކޮށް ބަންދު ދުވަސްތަކެއްކަމުގައި ކަނޑައެޅުމުން، ފަހު 10 ގެ ހެޔޮ ދަރުމަ އާއި ޘަވާބު ހޯދުމަށް ފަސޭހަވެގެންދާނެ ކަން ވެސް އެމަނިކުފާނު ފާހަގަކުރެއްވިއެވެ.

އެހެންކަމުން ރައީސް މުއިއްޒު ވަނީ، އެންމެންވެސް ފަހު 10 ގެ ބޭނުން ހެޔޮގޮތުގައި ހިފާނެ ކަމަށް އުންމީދުފުޅު ކުރައްވާކަމަށް ވިދާޅުވެފައެވެ.