އިޓާލިއަން ސެރިއޭގައި ހޮނިހިރު ދުވަހުގެ ރޭ ރަށުން ބޭރުގައި ލާޒިއޯ އަތުން 1-0 ގެ ނަތީޖާއަކުން ބަލިވެ، ދެވަނަގައި އޮތް އޭސީ މިލާން އާއި ޕޮއިންޓްގެ ގޮތުން އަރާ ހަމަކުރުމަށް ލިބުނު ފުރުސަތު ޔުވެންޓަސް އިން ނަގާލައިފި އެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި ހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު މި ހާފުގައި ދެޓީމުން ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. އެގޮތުން މިހާފުގައި ޔުވެންޓަސް އިން އެންމެ ހުސް ފުރުސަތެއް ލިބުނީ އެޓީމުގެ މިޑްފިލްޑަރު އަންދްރޭ ކެމްބިއާސޯ އަށެވެ. 

ނަމަވެސް އޭނާއަށް ލިބުނު ހުސް ފުރުސަތުގެ ބޭނުން ނުކުރެވި ދިޔައިރު، ލާޒިއޯ އިން މެޗުގެ ލީޑު ހޯދީ ދެވަނަ ހާފުގެ އިތުރު ވަގުތުގެ ތެރޭގައެވެ. މިލަނޑު އެޓީމަށް ކާމިޔާބުކޮށްދިނީ މިޑްފީލްޑަރު އެޑަމް މަރުސިޗް އެވެ.

މިއީ އެޓީމުގެ މިޑްފިލްޑަރު މަޓެއޯ ގުއެންޑޯޒީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ލާޒިއޯ ކުރީގައި އޮވެގެންނެވެ. އަދި މިއީ ޔުވެންޓަސް އެންމެ ފަހުން ކުޅުނު 9 މެޗުގެ ތެރެއިިން އެޓީމު ބަލިވި ހަތަރުވަނަ މެޗެވެ. އޭގެތެރެއިން ހަތަރު މެޗުން އެޓީމު އެއްވަރުވެފައިވާއިރު، މޮޅުވެފައި ވަނީ އެންމެ މެޗަކުންނެވެ.

މިމެޗުން ލިބުނު ތިން ޕޮއިންޓާއެކު ލީގުގައި ކުޅުނު 30 މެޗުން ލާޒިއޯއަށް 46 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލްގެ 7 ވަނައިގައެވެ. އަދި މިމެޗުން ބަލިވި ޔުވެންޓަސް އިން ލީގުގައި ކުޅުނު 30 މެޗުން ލިބުނު 59 ޕޮއިންޓާއެކު އެޓީމު މިވަގުތު އޮތީ ލީގު ތާވަލްގެ ތިންވަނައިގައެވެ.