ހުޅުމާލޭގެ ތިންވަނަ ފިޔަވަހީގެ ގޮތުގައި ބިން ހިއްކުމަށް ހަމަޖެހިފައިވާ ސަރަހައްދުގައި އަޅާފައިވާ އުޅަނދުތައް ނަގަން ހައުސިން ޑިވެލޮޕްމަންޓް ކޯޕަރޭޝަނުން އަންގައިފިއެވެ.

އެޗްޑީސީ އިން އިއްޔެ ނެރުނު ބަޔާނެއްގައި އަންގާފައިވަނީ ބިން ހިއްކަމުންގެންދާ ސަރަހައްދުގެ، ސައިޓް ބީގެ މަސައްކަތްތަކަށް ހުރަސްއެޅޭ ގޮތަށް އަޅާފައިވާ އުޅަނދުތައް ނެގުމަށެވެ.

ސައިޓް ބީ ގެ މަސައްކަތްތައް ކުރިއަށް ދާނީ އެކުލަވާލެވިފައިވާ ޗާޓުގައި ފެހި ކުލައިން ފާހަގަކޮށްފައިވާ ސަރަހައްދުގައެވެ.

އުޅަނދުތައް ނެގުމަށް އެޗްޑީސީއިން ދީފައިވާ ސުންގަޑިއަކީ ބުރާސްފަތި ދުވަހުގެ ރޭ މެންދަމު 12:00 އެވެ.

އެ ސަރަހައްދުން ނެގޭ އުޅަނދުތައް، އެ ސަރަހައްދުން ބޭރުގައި އެޅުމުގެ ފުރުސަތު ފަހިކޮށްދެވިފައިވާނެ ކަމަށްވެސް އެޗްޑީސީގެ ބަޔާނުގައި ވެއެވެ. އަދި މި މަސައްކަތުގައި ޢާންމު ރައްޔިތުންނާއި އުޅަނދުތަކުގެ ވެރިން އެއްބާރުލުން ދެއްވުމަށް އެދިލައްވާފައިވެއެވެ.

ގެދޮރުވެރިކަމުގެ މައްސަލަ ޙައްލުކުރުމަށް ހުޅުމާލެ ދެވަނަ ފިޔަވައްސާ ދިމާ ފަޅުތެރެއިން ބިން ހިއްކަން ފަށާފައިވަނީ މިދިޔަ އަހަރުގެ ސެޕްޓެމްބަރު މަހުގައެވެ. މި މަޝްރޫޢުގެ ދަށުން ޖުމުލަ 63 ހެކްޓަރުގެ ބިން ހިއްކާނެކަމަށް އަރބަންކޯއިން ބުނެފައިވެއެވެ.