ޖަރުމަނު ކަޕް ސެމީފައިނަލުގެ ދެވަނަ މެޗުގައި ބުދަދުވަހުގެ ރޭ އަމިއްލަ ދަނޑުގައި 4-0 ގެ ނަތީޖާއަކުން ޑަސެލްޑޯފް އަތުން މޮޅުވެ ބަޔާ ލޭވަކޫސަން އިން މުބާރާތްގެ ފައިނަލުން ޖާގަ ހޯދައިފި އެވެ.

މިސީޒަނުގައި މިހާތަނަށް އެއްވެސް މެޗަކުން ބަލިވެފައި ނުވާ، ލެވަކޫސަން އިން ވަނީ މިމެޗުގެ ފުރަތަަމަ ހާފުގައި ތިން ލަނޑުގެ ލީޑެއް ނަގާފައެވެ. އެގޮތުން އެޓީމުގެ ފުރަތަަމަ ލަނޑު މެޗު ފެށިގެން 7 ވަނަ މިނެޓުގައި ކާމިޔާބުކޮށްދިނީ އެޓީމުގެ ނެދަލޭންޑްސް ޑިފެންޑަރު ޖެރެމީ ފްރިމްޕޮންގް އެވެ.

މިއީ އެޓީމުގެ ފޯވާޑް ޕެޓްރިކް ޝިކް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި އެޓީމުން މެޗުގެ ލީޑު ފުޅާކުރި ލަނޑު ފުރަތަމަ ހާފުގެ 20 ވަނަ މިނެޓުގައި ކާމިޔާބުކޮށްދިނީ އެޓީމުގެ މޮރޮކޯ މިޑްފީލްޑަރު އަމީން އާދިލް އެވެ. މިއީ އެޓީމުގެ ޒުވާން މިޑްފީލްޑަރު ފްލޯރިއަން ވާޓްޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިމެޗުގައި ލޭވަކޫސަންގެ ތިން ލަނޑު ފުރަތަމަ ހާފުގެ 36 ވަނަ މިނެޓުގައި، ޒުވާން މިޑްފީލްޑަރު ފްލޯރިއަން ވާޓްޒް ކާމިޔާބުކޮށްދިނީ އެޓީމުގެ މިޑްފިލްޑަރު އަމީން އާދިލް ތަނަވަސްކޮށްދިން ފުރުސަތެއްގައެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ލެވަކޫސަން ކުރީގައި އޮވެގެންނެވެ.

މެޗުގެ ދެވަަނަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް މެޗު ޑޮމިނޭޓުކުރީ ލެވަކޫސަން އިންނެވެ. ނަމަވެސް މިސީޒަނުގައި ޖަރުމަނު ދެވަނަ ޑިވިޝަނުގައި ރަނގަޅު ކުޅުމެއް ދައްކަމުން އަންނަ ޑަސެލްޑޯފް އިން ވަނީ ދެވަނަ ހާފުގައި ލޭވަކޫސަންގެ އެޓޭކުތައް ހުއްޓުވުމުގައި ރޭވުންތެރިކަމާއެކު މޮޅު ޑިފެންސިވް ކުޅުމެއް ދައްކަދީފައެވެ.

މިމެޗުގައި ލޭވަކޫސަން އިން ކާމިޔާބުކުރި ހަތަރުވަނަ ލަނޑު ދެވަނަ ހާފުގެ 60 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ ޒުވާން މިޑްފީލްޑަރު ފްލޯރިއަން ވާޓްޒް އެވެ. މިއީ އުމުރުން 20 އަހަރުގެ ފޯވާޑް މިސީޒަނުގައި ޖަރުމަނު ކަޕްގައި ކުޅުނު ފަސް މެޗުގައި އޭނާ ކާމިޔާބުކުރި ތިންވަނަ ލަނޑެވެ. 

މިލަނޑާއެކު މެޗުގެ ކުޅުން ނިމިގެންދިޔައީ 4-0 ގެ ނަތީޖާއަކުން ލެވަކޫސަން ކުރީގައި އޮވެގެންނެވެ. އަދި މުބާރާތްގެ ފައިނަލުގައި މެއި މަހުގެ 25 ވަނަ ދުވަހު ލެވަކޫސަން އިން ނުކުންނާނީ ކައިސަރސްލައުޓަރން އާއި ދެކޮޅަށެވެ.