އެއާ އެމްބިއުލާންސްގައި މިހާތަނަށް 66 ދަތުރުކޮށްފައިވާ ކަމަށް މޯލްޑިވިއަނުން ބުނެފި އެވެ.

މިއީ ހާލު ދެރަ ބަލިމީހުން އަވަސް ފަރުވާއަށް މާލެއާއި ހަމައަށް ގެނައުމަށް ކޮށްފައިވާ ދަތުރުތަކެއް ކަމަށް މޯލްޑިވިއަނުން މިއަދު ވަނީ ބުނެފައެވެ.

ސަރުކާރުގެ ރަސްމީ ވައުދުގެ ދަށުން ޑޭޝް8-200 މަރުކާގެ މަތިންދާ ބޯޓެއް ބޭނުންކޮގެން އެއަރ އެމްބިޔުލާންސްގެ ޚިދުމަތް ރާއްޖޭގައި ފަށާފައިވަނީ 1 މާޗް 2024 ގައެވެ.

މި ޚިދުމަތަށް މޯލްޑިވިއަންއިން ސީ ޕްލޭންގެ ބޭނުން ކުރަން ފެށި މާރިޗްމަހުގެ 15 ވަނަ ދުވަހުއެވެ. އަދި އޭގައި ފުރަތަމަ މީހަކު އުފުލާފައިވަނީ މާރިޗްމަހުގެ 19 ވަނަ ދުވަހުއެވެ.

މޯލްޑިވިއަނުން އޮޕަރޭޓް ކުރަމުންދާ، އެ ދެ ބޯޓުގައިވެސް އެމަޖެންސީ ހާލަތުގައި ބަލި މީހަކަށް ފަރުވާ ދިނުމަށް ބޭނުންވާ ވަސީލަތްތަކާއި އާލާތްތައް ވަނީ ގާއިމުކޮށްފަ އެވެ. އޭގެ އިތުރުން، އެއާ އެމްބިއުލާންސްގައި ހިދުމަތް ދިނުމަށް 15 މީހަކު ތަމްރީންކޮށްފައިވާއިރު އޭގެތެރޭގައި ހިމެނެނީ ފަސް ޑޮކްޓަރަކާއި ފަސް ނަރުހަކާއި މެޑިކަލް ޓެކްނީޝަނުންނެވެ.

ކުއްލި ހާލަތުގައި މީގެކުރިން ބަލިމީހުން އުފުލީ އާއްމު ދަތުރުތަކަށް ބޭނުންކުރަމުންދާ މޯލްޑިވިއަންގެ ޝެޑިއުލް މަތިންދާ ބޯޓުތަކުގަ އެވެ. އަދި އެމްއެންޑީއެފްގެ އެހީގައި، ހެލިކޮޕްޓަރުގައި މި ހިދުމަތް ދީފައިވެ އެވެ.

ހެލްތު މިނިސްޓްރީ އާއި އެންސްޕާ އަދި އައިލެންޑް އޭވިއޭޝަން ގުޅިގެން ދިނުމަށް ހަމަޖެހިފައިވާ މިހިދުމަތް މިހާރު ވަނީ މޯލްޑިވްސް އިމަޖެންސީ މެޑިކަލް ސާވިސް ނިޒާމުގެ ތެރޭގައި ހިމަނާފަ އެވެ.