ކުރީގެ ރައީސް ޔާމީން އިސްވެ އުފައްދަވާ ޕީޕަލްސް ނޭޝަނަލް ކޮންގްރެސް (ޕީއެންއެފް) އުފެއްދުމުގެ ޖަލްސާ ބާއްވައި, ޕާޓީގެ ރައީސަކަށް ޔާމީންގެ ދަރިކަލުން ޒޭން އިންތިޚާބުކޮށްފިއެވެ.

ޕީއެންއެފް އުފައްދާ ޖަލްސާ ރޭ 9 ޖަހާއިރު އެންމެ ފުރަތަމަ ބޭއްވުމަށް ހަމަޖެހިފައި އޮތީ ގިޔާސުއްދީން އިންޓަނޭޝަނަލް ސްކޫލުގައެވެ.

ނަމަވެސް, ފުލުހުން ވަނީ މި ޖަލްސާއަށް ހުރަސްއަޅާފައެވެ. ފުލުހުން ވިދާޅުވިގޮތުގައި އެ ޖަލްސާ ހުއްޓުވާފައިވަނީ އެ ސްކޫލުގެ ހޯލު ދޫކުރުމަށް ހެދި އެއްބަސްވުން މިއަދު މެންދުރު ފަހު ބާތިލުކުރުމަށް ފަހު ވެސް, އެ ސްކޫލުގައި ޖަލްސާ ބާއްވަން އުޅުމުން ސްކޫލްގެ ތައްކާތެރިކަން ކަށަވަރުކުރުމަށް އެ ސްކޫލުން އެދިފައިވައިވުމުންނެވެ.

ޕީއެންއެފް އުފެއްދުމަށް ބޭއްވި ޖަލްސާ---ފޮޓޯ: ވޮއިސް

ޕީއެންއެފް އުފެއްދުމަށް ބޭއްވި ޖަލްސާގައި 329 މީހުން ބައިވެރިވި އިރު، އެ ޖަލްސާގައި ވަނީ ޕީއެންއެފްގެ ރައީސްގެ މަގާމަށް ޒެއިން، ވަގުތީ ސެކްރެޓަރީ ޖެނެރަލްގެ މަގާމަށް މަލީހު ޖަމާލް، ވަގުތީ ހަޒާންދާރުގެ މަގާމަށް އަހުމަދު މުސްތަފާ އަދި ވަގުތީ ރަޖިސްޓްރާގެ މަގާމަށް އަލީ ޝިޔާން އިންތިހާބުކޮށްފައެވެ. އެ މަގާމުތަކަށް އެ ބޭފުޅުން އިންތިހާބުކުރީ ޖަލްސާގައި ބައިވެރިވި 329 މީހުންގެ އިއްތިފާގުންނެވެ.

ޕީއެންއެފް އުފެއްދުމަށް ބޭއްވި ޖަލްސާގައި ރައީސް ޔާމީން--ފޮޓޯ: ވޮއިސް

މީގެ އިތުރުން ޕީއެންއެފް ވަގުތީ ގޮތުން ހިންގާ ކޮމިޓީއަށް ވަނީ ޔާމީން އިންތިހާބުކޮށްފައެވެ. އެ ކޮމިޓީގައި ޔާމީންގެ އިތުރުން، ޒެއިން، ޑރ. މުހައްމަދު ޖަމީލު އަހުމަދު، މަލީހުގެ އިތުރުން 17 މީހަކު ހިމެނިވަޑައިގަންނަވައެވެ. ޖުމުލަ 20 މެމްބަރުން ހިމެނޭ އެ ކޮމިޓީއަށް އެ ބޭފުޅުން އިންތިހާބުވެވަޑައިގަތީ ޖަލްސާގެ ބައިވެރިންގެ އިއްތިފާގުންނެވެ.

ޖަލްސާގައި ވަނީ ޕީއެންއެފްގެ ކުލަ، ނަން، ސިއްކަ، އެޑްރެސް އަދި އަސާސީ ގަވާއިދުވެސް އިއްތިފާގުން ފާސްކޮށްފައެވެ.

އެ ޖަލްސާ ބޭއްވިތަނަށް ރައީސް ޔާމީން ވަނީ ޖަލްސާ ނިމުނުފަހުން ވަޑައިގެންފައެވެ.