މިހިސާަބަށް އައިރު، ރާއްޖެ އިން ބޭރުގެ ފަރާތްތަކަށް ދަރަނި ދައްކަން ޖެހޭ މުއްދަތުތަކަށް ދަރަނި ދައްކައިފައިވާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުޢިއްޒު މިހާރު ލ އަތޮޅަށް ކުރައްވާ ދަތުރުފުޅުގެ ތެރެއިން ލ.މާވަށަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ވިދާޅުވީ، މަޝްރޫއުތައް ކުރިއަށްގެންދާނީ ފައިސާ ޗާޕުނުކޮށް އާމްދަނީ އިތުރުކޮށްގެން ބޭރުގެ ދައްކަމުން ކަމަށެވެ.

ރައީސް ޑރ.މުޢިއްޒު ވިދާޅުވީ ރައްޔިތުންގެ ނަމުގައި ނަގާފައި ހުރި ލޯނު ތަކުގެ އިތުރުން ސަރުކާރުގެ އެތެރޭގައި ހުރި ބިލު ތަކަށް ވެސް ފައިސާ ދައްކަމުން މަޝްރޫއުތައް ފަށައި އިގްތިޞާދު ކުރިއަރުވަން މަސައްކަތްކުރައްވަމުން ގެންދާ ކަމަށެވެ.

އިގްތިޞާދީ ކަންތަކަކާއި ގުޅޭ ބައިނަލްއަގުވާމީ ދެ އިދާރާ ކަމަށްވާ އައިއެމްއެފް އަދި ވޯލްޑްބޭންކުން ރާއްޖޭގެ ސިޔާސަތު ބަލައިގަތީ މި ސަބަބުތަކަށްޓަކައިކަން ފާހަގަކުރައްވާ ރައީސް ޑރ.މުޢިއްޒު ވިދާޅުވީ، އެހެންނޫންނަމަ ރާއްޖެ ދަރަނިވެރިގެން ގޮސް ވެއްޓޭނީ ފުން އަދަވަޅަކަށް ކަމަށާއި އެ ދަރަނިން އަރައިނުގަނެވޭނެ ކަމަށެވެ.

ރައީސް ޑރ.މުޢިއްޒުގެ ވާހަކަފުޅުގައި އެމަނިކުފާނު ވަނީ ލ.މާވަށުގައި ކުރިއަށް ގެންދިޔުމަށް ހަމަޖެހިފައިވާ މަޝްރޫއުތައް ވެސް މި ސިޔާސަތުގެ ދަށުން ކުރިއަށްދާނެ ކަމުގެ ޔަގީންކަން ދެއްވާފައެވެ.