ލާމު އަތޮޅާއި އައްޑޫ ސިޓީ އަށް ކުރެއްވި ދަތުރުފުޅަށްފަހު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މާލެ ވަޑައިގެންފިއެވެ.

ރައީސް ޑރ.މުޢިއްޒު ރަސްމީ ދަތުރުފުޅެއްގައި ލާމު އަތޮޅަށް ވަަޑައިގަތީ މި މަހުގެ 11 ވަނަ ދުވަހުއެވެ. މި ދަތުރުފުޅުގައި ރައީސް ޑރ.މުޢިއްޒު ވަނީ، އެ އަތޮޅުގެ ބައެއް ރަށްތަކަށް ވަޑައިގެން އެ ރަށްތަކުގެ ރައްޔިތުންނާއި ބައްދަލުކުރެއްވުމުގެ އިތުރުން، އެ އަތޮޅުގެ ރަށްތަކުގެ ކައުންސިލާއި އ.ތ.މ ކޮމިޓީ ތަކާއި ބައްދަލުކުރައްވާފައެވެ.

މި ބައްދަލުކުރެއްވުމުގައި ރައީސް ޑރ.މުޢިއްޒު ވަނީ އެ ރަށްތަކަށް ބޭނުންވާ ތަރައްގީގެ މުހިންމު މަޝްރޫއުތަކާއި ބެހޭގޮތުން މަޝްވަރާ ކުރައްވާފައެވެ.

Advertisement

މި ރަސްމީ ދަތުރުފުޅު ނިންމަވާލެއްވުމަށްފަހު، ނުރަސްމީ ދަތުރުފުޅެއްގައި ރައީސް ޑރ.މުޢިއްޒު އައްޑޫ ސިޓީ އަށް ވަޑައިގެންނެވީ އިއްޔެގެ ހަވީރުގެ ވަގުތެއްގައެވެ. ރައީސް ޑރ.މުޢިއްޒު އައްޑޫ ސިޓީ އަށް ވަޑައިގަތުމާއި އެކު އެ ސިޓީގެ ގިނަ ރައްޔިތުންތަކެއް ނުކުމެ އެމަނިކުފާނަށް ހޫނު މަރުހަބާއެއް ވަނީ ދަންނަވާފައެވެ.

ރައީސް ޑރ.މުޢިއްޒު އައްޑޫ ސިޓީ އަށް ވަޑައިގެން  އެމަނިކުފާނު ވަނީ ރައްޔިތުންގެ މަޖިލިސް އިންތިޚާބުގެ ޕީޕީއެމް/ޕީއެންސީގެ ކެންޑިޑޭޓުންގެ ކެމްޕޭން އިވެންޓްތަކުގައި ބައިވެރިވެވަޑައިގެންފައެވެ.