ރައްޔިތުންގެ މަޖިލީހުގެ ރައީސް، މުހައްމަދު އަސްލަމް، ކޯޓުތަކަށް ނުފޫޒު ފޯރުވަމުން ދާކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.

ވަޒީރު ޝިޔާމް މިހެން ވިދާޅުވީ، މި މަހު ބާއްވަން ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބަށް ކެމްޕެއިން ކުރުމަށް، އައްޑޫ ސިޓީގައި ބޭއްވި ކެމްޕެއިން ބައްދަލުވުމެއްގައި އަސްލަމްދެއްކެވި ވާހަކައަށް ރައްދު ދެއްވަމުންނެވެ.

ކެމްޕެއިން ޖަލްސާގައި އަސްލަމް ވިދާޅުވީ ކުރީގެ ރައީސް އަބްދުﷲ ޔާމީން އަބްދުލް ޤައްޔޫމްގެ ޝަރީޢަތުގެ އަޑުއެހުމެއް ނުބާއްވާތާ ގިނަ ދުވަސްތަކެއް ވުމުން ދޭހަ ވަނީ ސަރުކާރުން އެ މައްސަލައިގެ ތެރެއަށް ނުފޫޒު ފޯރުވައި އަތް ބާނަމުންދާ މިންވަރު ކަމަށެވެ.

ޔާމީންގެ ޝަރީއަތެއް އެންމެ ފަހުން ބޭއްވީ މީގެ ހަތަރު މަސް ދުވަސް ކުރިން ކަމަށާއި، ޝަރީއަތް ލަސްވާ މައްސަލަ ޖޭއެސްސީއަށް ހުށަހަޅުއްވާނެ ކަމަށްވެސް އަސްލަމް ވިދާޅުވިއެވެ.

އައްޑޫގައި ބޭއްވި ކެމްޕެއިނު ޖަލްސާގައި އަސްލަމް ވަނީ ޔާމީން އިސްވެ އުފައްދަވާ ޕީޕަލްސް ނެޝަނަލް ފްރޮންޓު (ޕީއެންއެފް) އުފެއްދުމުގެ ޖަލްސާ ބާއްވަން ކުރި މަސައްކަތަށްވެސް ސަރުކާރުން ހުރަސް އެޅި ކަމަށް ވިދާޅުވެ އެކަން ކުށްވެރި ކުރައްވައިފަ އެވެ.

އަސްލަމަށް ރައްދު ދެއްވަމުން، ވަޒީރު ޝިޔާމު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ އަސްލަމް އެއިރުވެސް އަދި މިހާރުވެސް ހުންނެވީ ޖޭއެސްސީ ޙިޞާރުކޮށްގެން ކޯޓުތަކަށް ނުފޫޒު ފޯރުވަން ކަމަށެވެ. އަދި 21 އޭޕްރީލްގައި އެކަން ނިމުމަކަށް ގެންނާނެ ކަމަށްވެސް ވަޒީރު ވިދާޅުވިއެވެ.

އަސްލަމު ޖަލްސާގައި ދެއްކެވި ވާހަކައަކަށް ޝުޖާއުވެސް ވަނީ އެކްސްގައި ރައްދު ދެއްވާފައެވެ. ޝުޖާއު ވިދާޅުވެފައިވަނީ ޔާމީންގެ މައްޗައް އިއްވާފައިވާ ޙުކުމުގެ މައްސަލައިގައި، އެމްޑީޕީގެ ސަރުކާރުގައި އަސްލަމާ ވެސް ބައްދަލުކުރެއްވި ކަމަށެވެ. އަދި އެ ދުވަހު އަސްލަމް ވިދާޅުވީ، ޔާމީން އޮންނަން ޖެހޭނީ ޖަލުގައި ކަމަށާއި މިނިވަނެއް ނުކުރެވޭނެ ކަމަށް ވިދާޅުވި ކަމަށެވެ.

ޔާމީނުގެ ޝަރީއަތާ ގުޅިގެން މައްސަލަ ބަލާ ހައިކޯޓުން އެންމެ ފަހުންވިދާޅުވެފައިވަނީ، ކޯޓުގައި ހުރި ގިނަ މައްސަލަތަކުގެ ތެރެއިން، ޔާމީނުގެ ޝަރީޢަތް ލަސްވަމުންދާ ކަމަށް ކޯޓުން ނުދެކޭ ކަމަށެވެ.