ރައްޔިތުންގެ މަޖިލިހުގެ މެމްބަރެއްގެ ގޮތުގައި އިންތިހާބުވީ ޕާޓީ ދޫކޮށް އެހެން ޕާޓީއަކަށް ބަދަލުވެއްޖެ ނަމަ، މެމްބަރު އަމިއްލައަށް އިސްތިއުފާ ދޭންޖެހޭ ގޮތަށް ރައްޔިތުންގެ މަޖިލީހުން ފާސްކުރި އެންޓި ޑިފެކްޝަން ބިލު ތަސްދީގު ނުކުރައްވައި ލަސްކުރެއްވުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ފާޅުގައި ޑިމޮކްރަސީ އަށް އަޅުއްވާ ހުރަހެއް ކަމަށް، ކުރީގެ ރައީސް އަދި އިދިކޮޅު އެމްޑީޕީގެ އެޑްވައިޒަރު އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައްޔިތުން މަޖިލީހުގެ އިންތިހާބުގެ ކެމްޕެއިނަށް މިހާރު ކުރައްވާ ދަތުރުފުޅުގެ ތެރެއިން ގއ. މާމެންދޫގައި ބޭއްވި ޖަލްސާއެއްގައި ވާހަކަފުޅު ދައްކަވަމުން ރައީސް ޞާލިހު ވިދާޅުވީ، ރައީސް ޑރ.މުޢިއްޒު ހުންނެވީ އެބިލު ހިފަހައްޓަވައިގެން ކަމަށެވެ.

މިއީ އެފަދަ ގާނޫނަކަށް މުހިންމު ވަގުތެއްކަން ފާހަގަކުރައްވާ ރައީސް ޞާލިހު ވިދާޅުވީ، ބިލު އަނބުރާ މަޖިލީހަށް ފޮނުވާލައްވާނެ ކަމުގެ މައުލޫމާތު ލިބެމުންދާ ކަމަށާއި، ބިލު އަނބުރާ ފޮނުވާލެއްވިޔަސް އަނެއްކާވެސް އެ ބިލް މަޖިލީހުގެ ތެރެއިން ފާސްކުރާނެ ކަމަށެވެ.

ބާރަށު ދާއިރާގެ އެމްޑީޕީ މެންބަރު އަހުމަދު އަބްދުﷲ ހުށައެޅުއްވި މި ބިލު މަޖިލީހުން ފާސްކޮށްފައިވަނީ މި މަހުގެ އެއްވަނަ ދުވަހު އެވެ.

މި ބިލުގައި ބުނާ ގޮތުން، އެމީހަކު އިންތިހާބު ގޮނޑިއަކުން 3 ހާލަތެއްގައި އިސްތިއުފާ ދޭންޖެހޭނެއެވެ. އެއީ އިންތިހާބުވި ޕާޓީން އަމިއްލައަށް ވަކިވުމާއި އެހެން ޕާޓީއަކަށް ބަދަލުވުމާއި އެހެން ޕާޓީއެއްގައި ދަފްތަރުވުން ނުވަތަ އަމިއްލަ ގޮތުން އިންތިހާބުވި މެންބަރަކު އެ މީހަކު އިންތިހާބުވި ދައުރުގެ ތެރޭގައި އެއްވެސް ސިޔާސީ ޕާޓީއަކާއި ގުޅުމެވެ.

މިއިން އެއްވެސް ކަމެއް މެދުވެރިވެއްޖެނަމަ 7 ދުވަހުގެތެރޭގައި އިސްތިއުފާ ދޭންޖެހޭނެކަމަށް ވެސް ބިލުގައި ވެއެވެ.

މި ބިލު އަދި ތަސްދީގުކުރައްވާފައި ނުވި ނަމަވެސް ރައީސް ޑރ.މުޢިއްޒު ވަނީ މީގެ ކުރިން މި ބިލާއި މެދު އެމަނިކުފާނު ދެކެވަޑައިގަންނަވާ ގޮތް ހިއްސާކުރައްވާފައެވެ. މިގޮތުން ރައީސް ޑރ.މުޢިއްޒު ވިދާޅުވީ، އިންތިހާބުވި ޕާޓީގަ ހުރުމަކީ އެންމެ ރަނގަޅު ގޮތް ކަމަށް ގަބޫލުފުޅު ކުރައްވާ ކަމަށާއި، މަޖިލީހުގެ މެންބަރުކަން ލިބެނީ ވަކި ޕާޓީއެއްގެ ޓިކެޓުގައި ވަކި ސިޔާސަތުތަކެއް ގެ ތެރެއިން ކަމަށްވާއިރު، އެ ތާއީދު ލިބުނު އަސާސްތައް ދޫކޮށްލައި އެހެން ޕާޓީއަށް ދިޔުމަކީ އެކަން އޮންނަންވާނެ ގޮތް ނޫން ކަމަށެވެ.