ފ.ދަރަނބޫދޫގެ ގިރާ ސަރަހައްދު ހިމާޔަތްކުރުމަށް ބޭނުންވާކަމަށް ރަށުގެ ކައުންސިލުން ބުނެފިއެވެ.
ރަށުގެ ކައުންސިލުން މިކަން ފާހަގަކޮށްފައިވަނީ، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ފާފު އަތޮޅަށް ކުރައްވާ ދަތުރުފުޅުގެ ތެރެއިން ދަރަނބޫދޫ ކައުންސިލާއި އ.ތ.މ ކޮމިޓީއާ ބައްދަލުކުރައްވައި އެރަށުގެ ތަރައްޤީގެ މުހިންމު ކަންކަމާ ގުޅޭގޮތުން މަޝްވަރާކުރެއްވުމަށް މިއަދު ހެނދުނު ދަރަނބޫދޫ ކައުންސިލު އިދާރާގައި ބޭއްވި ބައްދަލުވުމުގައިއެވެ.
މި ބައްދަލުވުމުގައި، ރަށުގެ ގިރާ ސަރަހައްދު ހިމާޔަތްކުރުން އެންމެ މުހިންމު ކަމެއްގެ ގޮތުގައި ރަށުގެ ކައުންސިލުން ފާހަގަކުރި އިރު، ރަށުން ދޫކޮށްފައި ހުރި ގޯތިތަކުގައި ގެދޮރުއެޅުމަށް ލުއިލޯނުފަދަ ލުއިފަސޭހަގޮތެއް ހޯދައިދިނުމަށް އެދުމާއި، ސްކޫލުގެ މަލްޓިޕަރޕަސް ހޯލްގެ މަސައްކަތް އަވަހަށް ނިންމަން ބޭނުންވާކަމަށް ވެސް ކައުންސިލުން ވަނީ ބުނެފައެވެ.
ހަމައެއާއިއެކު، ރަށުގެ މަގުތައް ހެދުމާއި، ޞިއްޙީ ދާއިރާއިން ބޭނުންވާކަންކަމާއި، ފުޓްބޯޅަދަނޑު ރަނގަޅުފެންވަރަކަށް ހެދުމާއި ވޮލީ ކޯޓެއްގެ އިތުރުން ޕާކެއް ތަރައްޤީކުރަން ބޭނުންވާކަމަށް ވެސް ދަރަނބޫދޫގެ ކައުންސިލުން ވަނީ ރައީސް ޑރ.މުޢިއްޒު އަށް ދަންނަވާފައެވެ.
މި ބައްދަލުވުމުގައި އ.ތ.މ ކޮމިޓީން ވަނީ ބަޖެޓުގެ ދަތިކަމުގެ އިތުރުން، ކޮމިޓީގެ މަސައްކަތްތައް ހިންގުމަށް ލިބިފައިވާ އިމާރާތެއް ބޭނުން ހިފޭގޮތަށް ހެދުމަށް އެހީތެރިކަން ބޭނުންވާކަމަށް ބުނެފައެވެ.
ޒުވާނުންގެ މަރުކަޒާއި ވޮލީކޯޓާއި އަދި ފުޓްބޯޅަ ދަނޑުގެ މަސައްކަތް ސަރުކާރުން ކުރިއަށް ގެންދިއުމަށް ހަމަޖެހިފައިވާ ކަމަށް ރައީސް ޑރ.މުޢިއްޒު ވިދާޅުވިއިރު، އެމަނިކުފާނު ވަނީ ކައުންސިލުން ފާހަގަކުރެއްވި ކަންކަމަށް އެދެވޭ ހައްލުތަކެއް ހޯދައިދެއްވުމަށް މަސައްކަތްކޮށްދެއްވާނެ ޔަގީންކަން ދެއްވާފައެވެ.
ހަމައެއާއިއެކު، މި ބައްދަލުވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރެއްވި ކަންކަމުގެ އެންމެ ފަހުގެ މަޢުލޫމާތުތައް ، ރައީސް ޑރ.މުޢިއްޒު ވަނީ ހިއްސާ ކުރައްވާފައެވެ.
Advertisement
This content is created and paid for by advertisers and does not involve Voice Journalists
