އިސްރާއީލަށް ހައްގުވާ އަދަބު ދެވިއްޖެ ކަމަށާއި، އިސްރާއީލުން ބަދަލުގައި ހަމަލާނުދޭހާ ހިނދަކު، އިސްރާއީލާއި ދެކޮޅަށް ކުރިއަށް ގެންދިޔަ އޮޕަރޭޝަން އިތުރަށް ކުރިއަށް ގެންދިޔުމުގެ ވިސްނުމެއް ނެތް ކަމަށް އީރާނުން ބުނެފިއެވެ.
އީރާނުން އިސްރާއީލަށް ޑްރޯނާއި މިސައިލް ބޭނުންކޮށްގެން ދިން ހަމަލާތަކަށް ފަހު އީރާނުން އދ އަށް ކަޑައަޅުއްވާފައި ހުންނަވާ ދާއިމީ ޞަފީރު އަމީރު ސައީދު އިރާވާނީ އދ ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް އާއި ސަލާމަތީ މަޖިލީހުގެ ރައީސް ވެނެސާ ފްރޭޒިއާ އަށް ފޮނުއްވި ސިޓީއެއްގައި ވިދާޅުވީ، އީރާނުން ގައުމު ދިފާއު ކުރަން ޖެހިއްޖެ ހާލަތެއްގައި އެކަން ކުރުމަށް ފަސްނުޖެހޭނެ ކަމަށެވެ.
މީގެ އިތުރުންވެސް، އިސްރާއީލުގެ ސަރުކާރުން އަނެއްކާ ވެސް މިދިޔަ ހަފްތާގައި ސީރިއާގައި ހުންނަ އީރާނުގެ އެމްބަސީ ކޮމްޕްލެކްސްއަކަށް ދިން ފަދަ ހަމަލާއެއް ތަކުރާރުކޮށްފިނަމަ އީރާނުން ރައްދުގައި ދެން ދޭ ހަމަލާ މިއަށްވުރެ ވަރުގަދަ ވާނެ ކަމަށް ވެސް އެ ސިޓީގައި ވެއެވެ.
އިރާވާނީ ވިދާޅުވީ، އީރާނުން އެ ގައުމުގެ ރައްޔިތުންނާއި ޤައުމީ ސަލާމަތާއި މަސްލަހަތާއި، އިސްތިޤްލާލާއި، ސަރަޙައްދީ އެއްބައިވަންތަކަން ރައްކާތެރި ކުރާނީ ބައިނަލްއަގުވާމީ ގާނޫނާއި އެއްގޮތަށް ކަމަށާއި، ގައުމަށް އަންނަ އިންޒާރުތަކަށް ހަމަލާދޭނީ ވެސް މިފަދައިން ކަމަށެވެ.
އީރާނުން އިސްރާއީލަށް ހަމަލާދީފައިވަނީ މިދިޔަ ހަފްތާގައި ސީރިއާގައި ހުންނަ އީރާނުގެ އެމްބަސީ ކޮމްޕްލެކްސްއަކަށް އިސްރާއީލުން ދިން ހަމަލާގެ ބަދަލު ހިފާނެ ކަމަށް ބުނެ ދެމުން ދިޔަ އިންޒާރުތަކަށް ފަހުއެވެ.
މިސައިލާއި ޑްރޯން ހިމެނޭ ގޮތަށް 200 އަށް ވުރެ ގިނަ ހަމަލާ އީރާނުން އިސްރާއީލަށް ފޮނުވާލިއިރު، އިސްރާއިލުގެ އަޔަން ޑޯމް އާއި ފައިޓަރ ޖެޓް ބޭނުންކޮށްގެން ބައެއް ހަމަލާތައް މަތަ ކުރި ނަމަވެސް އިސްރާއީލުގެ ބައެއް އަވަށްތަކަށް ޑްރޯންތަކުގެ ހަމަލާތައް ވަނީ އަމާޒުވެފައެވެ.
މި ހަމަލާގެ ބަދަލު ހިފާނެ ކަމަށް އިސްރާއީލުން ބުނެފައިވާއިރު، އިސްރާއީލުގެ މި އަމަލުގައި އެމެރިކާއިން ބައިވެރިނުވާނެ ކަމަށް އެގައުމުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
